Futbollisti i njohur dhe aktualisht lojtar i Medipol Basaksehir-it turk, Mesut Ozil i ka dhënë fund karrierës së tij si lojtar.
Lajmin e ka bërë të ditur vetw në rrjetet sociale dhe ka shtuar se këtë hap e ka menduar prej kohësh pas 17 viteve mjaft të suksesshme të kaluar në futbollin profesionist.
“Jam jashtëzakonisht mirënjohës për këtë mundësi. Megjithatë, pasi pësova disa lëndime në javët dhe muajt e fundit, është bërë e qartë se ka ardhur koha që të largohem nga skena e madhe e futbollit,” tha Ozil.
Duke theksuar se karriera e tij ka qenë një udhëtim i mrekullueshëm plot momente dhe emocione të paharrueshme, 34-vjeçari Ozil falënderoi të gjithë bashkëlojtarët e tij në Schalke 04, Werder Bremen, Real Madrid, Arsenal, Fenerbahce dhe Medipol Basaksehir.
Suksesin më të madh në karrierën e tij në klub ai e arriti me Real Madridin, ku luajti 159 ndeshje dhe fitoi ligën spanjolle dhe Kupën e Mbretit, si dhe me Arsenalin, ku luajti 254 ndeshje dhe fitoi katër Kupa FA.
Ozil luajti dhe 92 ndeshje për kombëtaren gjermane duke shënoi 23 gola. Po ashtu ai fitoi titullin e kampionatit botëror në Brazil në 2014. /tesheshi.com/
