Mesfushori me tipare sulmuese i Arsenalit ka dhënë një intervistë për një media gjermane, ku ka folur për mundësinë e kthimit të tij në Spanjë, për Arsenalin e për trajnerin aktual të Realit të Madridit, Zinedine Zidane.
Mesut Özil e ka përjashtuar një kthim të afërt në futbollin spanjoll. “E ardhmja ime? Jam i përqendruar vetëm te Arsenali. Nuk ka të vërtetë në zërat që më lidhin me një kthim në Spanjë.”
Në fakt, prej kohësh po flitet për një kalim të tij te Barcelona gjatë verës.
Duke iu kthyer situatës te Arsenali, Özil ka deklaruar se topçinjtë duhet të fajësojnë veten për pozitën në të cilën ndodhen. “Ne nuk kemi luajtur me mundësitë tona kundër ekipeve të ashtuquajtura të vogla. Dhe për këtë ndëshkoheni menjëherë në Premier League.”
Arsenali ndodhet në vend të tretë në kampionatin anglez, me 11 pikë larg Lestërit të vendit të parë, veçse ka luajtur një ndeshje më pak.
“Kemi ende një mundësi për ta fituar titullin,” ka thënë Özil. “Duhet të shpresojmë që Lestëri e Totenhemi të gabojnë.”
I pyetur në intervistë për francezin Zinedine Zidane që po drejton Realin e Madridit, ish-skuadrën ku ai luajti më herët, Mesut Özil është treguar i pakursyer në lëvdata: “Ai qe një futbollist i madh. Ai ishte një nga futbollistët më inteligjentë në botë.” /tesheshi.com/
