Pas takimin me kreun e NATO-s në Bruksel, presidentja Osmani tha se Kosova po përjeton ndërhyrje të huaja të paligjshme. Ajo ka theksuar se veriu do të vazhdojë të jetë pjesë integrale e Republikës së Kosovës.
Në selinë e aleancës ushtarake në Bruksel, , Osmani ka thënë se Kosova dhe NATO janë përjetësisht të lidhura.
“Kosova po përjeton ndërhyrje të vazhdueshme të huaja të paligjshme dhe pengim të vazhdueshëm të autoritetit legjitim dhe sovranitetit në veri të vendit tonë. Kjo në shumë raste ka çuar në agresion siç përcaktohet nga ligji dhe praktikat ndërkombëtare. Më lejoni të jem e qartë: veriu i Kosovës ishte dhe do të vazhdojë të jetë pjesë integrale e Republikës së Kosovës. Nuk do të lejojmë që veriu i Kosovës të bëhet fushëbetejë për arritjen e ambicieve hegjemoniste të autokratëve rajonalë. Në vend të kësaj, ne jemi të përkushtuar për integrimin e mëtejshëm të komuniteteve lokale, duke mbrojtur të drejtat e tyre të garantuara me kushtetutë”, ka thënë ajo me në krah Jens Stoltenberg
Osmani theksoi se duhet të marrin fund ndërhyrjet e serbëve sa i përket oficerëve të Policisë së Kosovës të cilët po detyrohen të japin dorëheqje.
“Ne jemi të përkushtuar që të vazhdojmë avancimin e forcës sonë policore multietnike në shërbim të të gjithë popullit të Kosovës dhe në të gjithë territorin e Republikës sonë. Përderisa presionet e Serbisë po shtohen ndaj Kosovës, oficerët serbë që shërbejnë në Policinë e Kosovës japin dorëheqje, policia jonë mbetet në shërbim të popullit. Dhe për njerëzit në të gjithë Republikën, kjo lloj ndërhyrjeje tinzare e huaj duhet të marrë fund”, ishte arsyetimi i presidentes Osmani. /tesheshi.com/
