Presidentja e Kosovës, Vjosa Osmani, në takimin me përfaqësuesin special të Britanisë për Ballkanin Perëndimor, Stuart Peach, ka kërkuar që “bashkësia ndërkombëtare të dënojë tendencat destabilizuese të Serbisë”.
Osmani tha se institucionet e Kosovës janë të përkushtuara për paqen dhe sigurinë dhe se thirrjet për “dy palët” nuk duhet të barazojnë Kosovën me Serbinë “sepse e dimë kush është agresori”.
Në deklaratën e saj thuhet se “Presidentja Osmani theksoi se Kosova është e koordinuar me partnerët ndërkombëtarë në zgjidhjen e sfidave të sigurisë dhe në këtë kontekst ka kërkuar pjesëmarrje më të madhe të Britanisë së Madhe si anëtare kyçe e NATO-s dhe partner historik i Kosovës”.
“Dihet kush është agresori”
Osmani theksoi se Kosova është një “palë konstruktive në lidhje me dialogun me Beogradin”, por se pala serbe, “përmes përpjekjeve të saj për të destabilizuar Kosovën, po përpiqet të zhvendosë fokusin e dialogut”.
“Në këtë frymë, presidentja Osmani kërkoi që bashkësia ndërkombëtare të mbajë një qëndrim të unifikuar ndaj tendencave destabilizuese të Serbisë duke dënuar veprime të tilla dhe duke mos barazuar palët kur është e qartë se kush është agresori”, thuhet në deklaratë.
Osmani tha se në veri të Kosovës, ligji kontestohet nga “grupet kriminale të drejtuara nga Serbia dhe bandat që janë në listën e zezë të SHBA-së dhe Britanisë së Madhe”, dhe se “është në kompetencë të institucioneve të Kosovës që të sigurojnë sundimi i ligjit, paqes dhe sigurisë në mënyrë të barabartë në gjithë Republikën e Kosovës dhe për të gjithë qytetarët pa dallim”. /tesheshi.com/
