Një raport i brendshëm i OSBE-së ku përmenden emrat politikanësh e biznesmenësh shqiptarë, lidhjet mes tyre e afera të pahetuara korrupsioni, është i hartuar nga të dhënat e mbledhura nëpër media të ndryshme dhe përbën një dokument të brendshëm të organizatës.
Ambasadori i OSBE-së në Tiranë, Florian Rauning shprehu keqardhjen për rrjedhjen e materialit në media dhe përdorimin e tij për keqinterpretime dhe manipulime politike.
Rauning shpjegoi nga Korça ku ambasadori ndodhej për vizitë, se dokumenti është publikuar nga media shqiptare pa autorizim.
“Informacioni i botuar nuk përfaqëson as politikën e OSBE-së apo pikëpamjen tonë zyrtare, as nuk përbën një vlerësim apo gjykim dhe as nuk ka shërbyer si bazë për raporte të tjera. Dëshiroj të përsëris se përmbledhja ishte thjesht një grumbullim informacioni nga raportime të medias shqiptare dhe pretendimeve që qarkullonin në publik. Prezenca nuk e verifikoi informacionin e përdorur, pasi qëllimi i asaj përmbledhjeje ishte pasqyrimi i pretendimeve dhe jo përcaktimi i të vërtetës. Prezenca shpreh keqardhjen për shqetësimin që ky informacion mund t’u ketë shkaktuar personave të përmendur në materialin informues”, tha Rauning.
Sidoqë të jetë materiali, ai ka ndezur polemika të mëdha në politikën dhe median shqiptare, pasi në të përmenden emrat e politikanëve kryesorë të vendit, ku radhiten kryeministri Edi Rama, paraardhësit e tij Sali Berisha, Ilir Meta për pasurinë e tyre, korrupsion, veprimtari biznesi të paligjshme ndërsa për një pjesë të deputetëve shqiptar flitet deripër lidhje me mafian ruse.
OSBE thotë se i referohet medias, e kjo e fundit i referohet OSBE-së, ky qark i shkurtër ka ndezur për disa ditë shpresën se ndërkombëtarët kishin vërtet informacione që duhet t’i ndanin me publikun për pastrimin e politikës. /tesheshi.com/
