Efekti Iniesta u ndje te Barcelona që në klasiken ndaj Realit, ndërsa mesfushori u kthye në fushë pas një mungese të gjatë për arsye dëmtimi. Ndaj Osasunës, në transfertë, Barcelona u kthye te loja e saj tradicionale me Iniesta-n në lojë, duke e patur zotërimin e topit në 76 për qind të ndeshjes.
Katalanasit e lanë pas zhgënjimin e barazimit ndaj Realit me një fitore 0-3. Trepikëshi ndaj Osasunës e afroi më tepër Barcelonën me Realin e Madridit të vendit të parë në klasifikimin e La Ligës. Madrilenët, të cilët sonte në mbrëmje presin Deportivo la Korunjën, kanë 34 pikë, vetëm tre më shumë se Barcelona.
Osasuna arriti ta mbante të paprekur portën sot në pjesën e parë, në takimin e dytë të javës së 15-të të kampionatit spanjoll.
Por asgjë nuk e ndali Barcelonën në pjesën e dytë. Suarez hapi serinë e golave, të pasuar nga dy të tjerë të shënuar nga Lionel Messi. Goli i tretë, që vulosi dhe rezultatin 0-3, u realizua në minutën e 92-të.
“E merituam fitoren; krijuam shumë raste. Jam vërtet i kënaqur me lojën që pashë dhe me paraqitjen nga lojtarët e mi,” deklaroi pas ndeshjes trajneri Luis Enrique. /tesheshi.com/
