Komisioni Europian Kundër Racizmit dhe Intolerancës i ka bërë thirrje Serbisë ta njohë zyrtarisht si gjenocid masakrën e vitit 1995 në Srebrenicë dhe t’i ndëshkojë personat përgjegjës.
Një raport i përvitshëm mbi Serbinë i bërë publik të martën nga ky organizëm i Këshillit të Europës thoshte mes të tjerash se Beogradi duhet të vërë në zbatim aktivisht një strategji për t’i ndëshkuar fajtorët për krime lufte.
Drejtuesi i këtij organizmi, Christian Ahlund, deklaroi një ditë më parë se, “Udhëheqësit politikë duhet ta pranojnë zyrtarisht se masakrat e kryera në Srebrenicë përbëjnë gjenocid.”
Rreth 8.000 muslimanë boshnjakë u vranë në Srebrenicë në korrik të vitit 1995, me gjithë praninë në terren të forcave holandeze si paqeruajtëse të OKB-së.
Një rezolutë e miratuar në 2010-n në parlamentin serb i dënonte masakrat, por nuk e cilësonte një krim të tillë në Srebrenicë si gjenocid.
Vetëm pas 22 vitesh, në shkurt të këtij viti, në Beograd ka nisur gjyqi i parë për Srebrenicën, ku përpara gjykatës janë vënë tetë ish-anëtarë të njësisë speciale policore serbo-boshnjake për pjesëmarrjen në vrasjen e më shumë se 1.300 civilëve boshnjakë në Kravica, pranë Srebrenicës. /tesheshi.com/
