Siç njofton Al Jazeera, Human Rights Watch dhe Amnesty International bënë të njohura dje dy raporte kërkimore mbi shkeljen e të drejtave njerëzore nga policia franceze gjatë gjendjes së jashtëzakonshme, duke vënë në pah rastet e ushtrimit të dhunës.
Sipas këtyre organizatave, policia franceze ka kryer bastisje e arreste shtëpiake abuzive dhe diskriminuese ndaj muslimanëve nën gjendjen e jashtëzakonshme, duke i traumatizuar dhe stigmatizuar të vënët nën shënjestër, përfshirë fëmijë e të moshuar.
Ata që e kanë pësuar prej dhunës policore kanë treguar se policia ka mësyrë në shtëpi, në restorante apo në xhami, duke thyer sendet e njerëzve, duke i hedhur Kur’anet në tokë, duke i tmerruar fëmijët, e duke e kufizuar lëvizjen e njerëzve, aq sa ata kanë humbur punën dhe të ardhurat.
Bastisjet që nisën më 14 nëntor të vitit që lamë pas në përgjigje të sulmeve të Parisit, e që, sipas organizatave të mësipërme, ishin më së paku 3.200, kanë dhënë pak rezultate.
Human Rights Watch thotë se, ndërsa 350 deri në 400 njerëz janë vendosur në arrest shtëpiak, njësia e kundërterrorizmit e prokurorisë së Parisit ka hapur vetëm pesë hetime të lidhura me terrorizmin.
Më shumë se 60 të intervistuar prej Amnesty International kanë rrëfyer se policia ka ushtruar forcë të tepruar dhe ka marrë masa të ashpra pa dhënë asnjë shpjegim, ose duke dhënë fare pak.
“Franca ka përgjegjësinë për të garantuar sigurinë publike dhe për t’u përpjekur për të parandaluar sulme të tjera, por policia i ka përdorur në mënyrë abuzive, diskriminuese dhe të pajustifikuar kompetencat e reja të gjendjes së jashtëzakonshme,” është shprehur Izza Leghtas, një prej aktivisteve hulumtuese të Human Rights Watch-it.
“Masat nën një gjendje të jashëzakonshme duhet të respektojnë kushtet strikte: ato duhet të kufizohen gjithmonë me çfarë kërkohet në mënyrë strikte nga nevojat e situatës së jashtëzakonshme,” thuhet në raportin e Amnesty International. /tesheshi.com/
