Stefan Henze, trajneri i ekipit gjerman të kanoes në Lojërat Olimpike, humbi jetën pas një aksidenti në Rio de Zhanejro, por dhurimi i organeve të trupit të tij u ka shpëtuar jetën katër personave.
Shtypi gjerman bëri të ditur se organet e tij u janë dhuruar katër njerëzve në nevojë për to. Po kështu, një zëdhënës i Ministrisë braziliane të Shëndetësisë i tha gazetës gjermane Die Welt, “Zemra, mëlçia dhe dy veshkat janë transplantuar suksesshëm. Në këtë mënyrë, ai ka shpëtuar katër jetë.”
Trajneri i kanoes do të përfshihej të premten e shkuar në një aksident automobilistik pranë parkut olimpik në Rio de Zhanejro. Stefan Henze nuk mundi t’i përballojë plagët, edhe pse iu bënë ndërhyrje kirurgjikale në tru, duke humbur jetën të hënën. Familjarët e tij do të jepnin pëlqimin për dhurimin e organeve.
Ai ka qenë më herët dhe pjesëmarrës si sportist në Lojërat Olimpike. Në Lojërat e Athinës të vitit 2004, Henze pati fituar medaljen e argjendë në garat dyshe me kanoe.
Komiteti Olimpik Gjerman do ta përshkruante si humbje të tmerrshme vdekjen e trajnerit të kanoes. /tesheshi.com/
