Kryeministri hungarez Viktor Orban tha se Serbia duhet të hyjë sa më shpejt në Bashkimin Evropian, përndryshe Brukseli do ta humbasë.
Në një intervistë për gazetën austriake Die Presse, Orban tha se në rast të vonesës për anëtarësimin në BE, Beogradi mund të zgjedhë bashkëpunimin me partnerë të tjerë.
“Ne duhet të përfundojmë detyrën e vjetër të zgjerimit përpara se të fillojmë një të re me Ukrainën. Nëse nuk e integrojmë Serbinë sa më shpejt, do ta humbasim. Serbia ka mundësi të tjera. Sapo ka përfunduar një marrëveshje për tregtinë e lirë me Kinën”, tha Orban.
Kryeministri hungarez e quajti gjithashtu “prioritetin kryesor” të Budapestit zgjerimin e BE-së me vendet e Ballkanit Perëndimor gjatë presidencës së Këshillit të Bashkimit Evropian, që fillon më 1 korrik.
Shqipëria, Bosnja, Gjeorgjia, Moldavia, Maqedonia e Veriut, Serbia, Turqia, Ukraina dhe Mali i Zi kanë statusin zyrtar të kandidatëve për anëtarësim në BE. /tesheshi.com/
