Kryeministri hungarez Viktor Orban, një rebel europian ndaj BE-së, i ka përcjellë një letër falenderimi ish-kryeministrit Berisha, për arsye se ky i fundit e ka uruar për fitoren e pestë në Hungari.
“Dëshiroj t’ju shpreh mirënjohjen time për urimet tuaja pas fitores sonë në zgjedhjet parlamentare në Hungari.
Jam krenar që qytetarët hungarezë kanë shprehur besimin e tyre në një qeverisje të pavarur bazuar mbi vlera kombëtare dhe na kanë nderuar me besimin e tyre për të pestën herë tashmë.
Besoj që ky mandat i fortë nuk është vetëm një garanci për stabilitetin politik dhe zhvillimin ekonomik të Hungarisë, por është gjithashtu një qëndrim kurajoz për paqen dhe sigurinë e vendit tonë”, e nis letrën e tij Orban.
Më tej, veçohet fakti se Orban e trajton Berishën si të krishterë, duke e parë politikanin musliman nga Tropoja si të rreshtuar në të njëjtën kauzë me të.
“Ju siguroj që do të mbetemi të angazhuar të mbrojmë vlerat tona të përbashkëta kristiano-konservatore dhe të zhvillojmë gjithashtu marrëdhëniet shqiptaro-hungareze në të ardhmen”, shkruan Orban.
Kujtojmë se që të dy bashkohen te shpallja luftë ndaj Sorosit, por për motive të ndryshme.
Orban sheh te bashkëatdhtari i tij islamizuesin e Europës, nëpërmjet teorisë së “lëvizjes së lirë”, ndërsa Berisha mendon se “non grata”-n amerikane e ka nga ai, pra Soros.
Tjetër pikë përbashkuese është se ndërsa Orban prej kohësh bën rebelin ndaj BE-së, Berisha po e bën atë ndaj SHBA-së. /tesheshi.com/
