Nga Blendi Gashi
Qeveria e Kosovës prej kohësh ka paralajmëruar ndryshime në kabinet.
Ndërkohë, mënyra se si bëhet riformatimi i qeverisë në Kosovë është kritikuar në vazhdimësi pasi nuk bëhet një analizë e mirëfilltë publike, por dhe politike, se cilët ministra duhet larguar e cilët jo. Më saktë, nuk kalojnë në sitën e Kuvendit.
Edhe është së fundmi një propozim i n/kryetarit të Kuvendit të Kosovës nga radhët e PDK-së, Xhavit Haliti, i cili ka paraqiturv disa vërejtje e më pas disa propozime.
“Ministrat nuk bëjnë betimin në Parlament dhe nuk nënshkruhen nga Presidenti pas propozimit. Çdo ndryshim i ministrave duhet të kalojë në Parlament për të marrë besimin e deputetëve. Më lehtë të bëhesh të kalosh procedurën të bahesh ministër se sa të hysh në punë si nëpunës në institucionet e Kosovës. Sepse vetëm me një miratim të kryeministër mund të bëhesh. Deri tash asnjë ministër nuk ka bërë betim pas riformatimeve. Mendojë se edhe shkarkimi apo ndryshimi i secilit dikaster të votohet në parlament”, ka thënë Haliti për mediat kosovare.
“Riformatimi të ndodh nga kryeministri”
Partitë opozitare, propozimin e bërë nga Xhavit Haliti i PDK-së, e shohin më shumë si çështje e ngritur nga ai për t’iu ikur temave të ndjeshme për vendin.
Avni Arifi, nga AAK thotë se çështja e ndryshimit të ministrave nuk është e nevojshme të shkohet në Kuvend, pasi që partnerët qeverisës vendosin se kënd duan ta emërojnë në pozita të tilla.
“Në kushte normale është çështje e partnerëve të koalicionit se me cilët ministra duan të qeverisin. Për partitë që qeverisin është me rëndësi që qytetari të vlerëson.
Sa për qeverinë aktuale më së miri formatimi të fillon nga kryeministri, sepse është më i dobëti në kabinetin qeveritar, ministrat dhe armata e zv.ministrave”, thotë Arifi, për tesheshi.com.
Valdete Bajrami, deputete e partisë NISMA për Kosovën, nuk komenton idenë e Halitit, por thotë se Isa Mustafa së bashku me partnerët e koalicionit që i ka pra, PDK-në dhe Listën Serbe, është dashur që në fillim mos të krijonin ministri së koti.
“Duke e ditur që pikërisht koalicioni PDK-LDK-LS është krijuar mbi bazën e pazareve, është vështirë të besohet se mund të ketë riformatim. Kjo qeveri jolegjitime e shkelëse e aktit më të lartë të shtetit për asnjë moment nuk ka punuar për të mirën e shtetit dhe të qytetarëve, kjo u dëshmua që nga ardhja e tyre në pushtet. Kjo qeveri është e njohur në rajon për përbërjen e saj të madhe, por del edhe të jetë qeveria më e dështuar që nga pas lufta. Jeni dëshmitar që kjo qeveri nuk e ka as seriozitetin më të vogël duke mos përmbush as edhe një premtim të bërë gjatë fushatës, ky kabinet është formuar për interesa të partive pra PDK, LDK dhe LS dhe jo për t’i ofruar qytetarëve dhe vendit një të ardhme më të mirë, kjo dëshmohet me mos prezencën e ministrave në seancat plenare, duke anashkaluar totalisht kuvendin, nuk i përgjigjen pyetjeve të deputetëve, etj”, thotë deputetja Bajrami, për tesheshi.com.
Deputetja e NISMA-s thotë se për ta dëshmuar se kjo qeveri nuk mendon për të ardhmen e vendit dhe të qytetarëve, është mospuna e tyre në përmbushjen e premtimeve të bëra gjatë fushatës
“Kjo qeveri bën mirë të që sa më parë të jap dorëheqje dhe t’i ofrohen qytetarëve zgjedhjet e parakohshme, sepse definitivisht po e them prap kjo qeveri është me përbërjen më të madhe e më të keqe dhe është qeveria më e dështuar që nga pas lufta”, thotë Bajrami.
Ligji për qeverinë do t’i përcaktonte shumë rregulla në lidhje me zgjedhjen e ministrave
Analisti politik, Albinot Maloku thotë se qeveria e Republikës së Kosovës funksionon pa Ligjin për Qeverinë i cili do t’i përcaktonte shumë rregulla në lidhje me zgjedhjen e ministrave, shkarkimin e tyre, ose edhe shuarjen apo ngritjen e dikastereve të veçanta, potencialisht të nevojshme për qeverinë.
“Nga kryeministri Isa Mustafa, u premtua që çështja e ligjit për qeverinë të futet në rend të ditës, me këtë premtim pati përfolur edhe propozimin e draft ligjit por asgjë nuk u bë e ditur më. E përfolura rreth draft ligjit për qeverinë ka nisur që në 2009, dhe asgjë nuk ka lëvizur në këtë drejtim. Si pasoj e kësaj, çdo qeveri në Kosovë ka ndërrua formë e përmbajtje kur bëhet fjalë për numrin dhe dikasteret qeveritar. Shtimi i dikastereve ministrore dhe zëvendësministrave është bërë jo për punë më efikase, por për të mbuluar rehabilitimin e partnerëve të koalicionit”, thotë Maloku, për tesheshi.com.
Sipas tij mënyra aktuale e zgjedhjes, emërimit, shkarkimit, shuarjes apo ngritjes së një dikasteri të ri qeveritar, fatkeqësisht është e bazuar mbi vullnetin e partnerëve të koalicionit dhe të kryeministrit si ekzekutues i veprimeve. /tesheshi.com/
