Kreu demokrat Basha paralajmëroi një tjetër bllokim aksesh rrugore të enjten, që sipas tij janë pjesë e mosbindjes civile. Kjo u tha prej tij pas një takimi me aleaten më të ngushtë, Monika Kryemadhin e LS-së.
“Jemi në një krizë të thellë, në një krizë politike, kushtetuese, ekonomike dhe sociale dhe siç u bë e qartë që edhe 24 orët e fundit vendi ndodhet në një krizë totale të procesit më jetik për Shqipërinë, atë të integrimit të vendit në BE. Shkak për këtë është krimi elektoral. Ndaj do vazhdojmë aksionin tonë në të gjitha planet. Nesër nga ora 18:00 do nisë aksioni në të gjithë vendin për bllokimin e akseve më të rëndësishme rrugore, si një shenjë e mosbindjes civile. Paradite në orën 11:00, do shpalosim së bashku me koalicionin opozitar detyrat e qeverisë transitore për të garantuar zgjedhje të lira dhe të ndershme. Do flasim edhe për platformën tonë që do iu prezantojmë shqiptarëve”, tha Basha, që më pas përcolli mesazhin tjetër, atë që nuk ka ulje në tryezë me Ramën.
“Asgjë nuk ka ndryshuar në qëndrimin e opozitës dhe koalicionit politik, të mazhorancës së re. Largimi i Edi Ramës është kusht i panegociueshëm për të hapur rrugën e dialogut politik për një qeveri tranzitore që të organizojë zgjedhje të lira dhe të ndershme”, theksoi Basha. /tesheshi.com/
