Përmes një deklarate të një dite më herët, blloku kryesor opozitar në Siri ka njoftuar se do t’i përmbahet një armëpushimi dyjavor në vend për të parë gatishmërinë e palës tjetër.
“Komiteti i Lartë i Negociatave beson se një armëpushim i përkohshëm për dy javë do të siguronte një mundësi për të parë angazhimin e palës tjetër,” thuhet në deklaratën.
“Ne ramë dakort t’u përgjigjemi pozitivisht përpjekjeve ndërkombëtare për të arritur një marrëveshje armëpushimi,” deklarohet nga Komiteti i Lartë i Negociatave. Sipas deklaratës së lëshuar, armëpushimi duhet të shpallet njëkohësisht nga të tëra palët.
Sidoqoftë, angazhimi i opozitës siriane ndaj armëpushimit është i kushtëzuar me heqjen e rrethimeve, me lirimin e të burgosurve, me ndaljen e bombardimeve ndaj civilëve e me shpërndarjen e ndihmave humanitare.
SHBA-të dhe Rusia u pajtuan në fillim të kësaj jave që të ketë një ndërprerje të luftimeve në Siri, që do duhet të fillojë në mesnatën mes së premtes dhe së shtunës, e që do duhet të nënshkruhet gjer në mesditen e së premtes, më 26 shkurt. Marrëveshja nuk i përshin ISIS-n dhe Frontin en-Nusra. /tesheshi.com/
