Agjencia e lajmeve Reuters bën të ditur se opozita e armatosur siriane do të kthehet ditën e sotme në bisedimet që po mbahen në kryeqytetin e Kazakistanit.
Lajmi vjen nga burime pranë negociatave në Astana, ndërsa Reuters njofton se delegacioni opozitar nuk ka mbërritur ende në vendin e zhvillimit të bisedimeve.
Kryengritësit e pezulluan pjesëmarrjen në bisedimet e Astanasë një ditë më parë në shenjë proteste ndaj sulmeve ajrore në zonat nën kontrollin e tyre në Siri, duke kërkuar ndalimin e tyre.
Ky është raundi i katërt i bisedimeve në Astana që prej fillimit të këtij viti. I dërguari i OKB-së për Sirinë, Staffan de Mistura, u bëri thirrje po ashtu dje kryengritësve të kthehen në tavolinën e bisedimeve.
Ndërkaq, krijimi i zonave të sigurta në Siri ka qenë dje temë e bisedimeve mes presidentit rus Vladimiri Putin dhe atij turk, Recep Tayyip Erdoğan. Ata shprehën besimin nga Soçi në Rusi se qeveria siriane dhe kryengritësit sirianë kanë për ta miratuar këtë propozim të fundit për të ndërprerë përshkallëzimin e konfliktit gjashtëvjeçar. /tesheshi.com/
