Kreu demokrat Basha, pas një mbledhjeje me aleatët, zhvilluar nën atmosferën e çështjes “Xhafaj” apo “bashkëpunëtori x”, paralajmëroi një protestë më 26 maj, ditën që në fakt ka hyrë në historinë politike të pluralizmit, si dita e manipulimit masiv të votës, dedikuar zgjedhjeve të 1996-ës.
Pa dashje apo me qëllim, pikërisht në 22-vjetorin e fitorës së thellë, por krejt të dyshimtë të PD-së së atëhershme, kur kryetar partie ishte Tritan Shehu e Berisha ishte president, Basha bëri thirrje për dalje masive, sipas tij, për të larguar kriminelët nga pushteti
“Opozita e Bashkuar i fton të gjitha qytetarët shqiptarë, demokratë e socialistë, të bashkohemi në protestën më të madhe. Ju ftoj të protestojmë për largimin nga pushteti të kriminelëve. I ftoj qytetarët që të protestojmë së bashku për largimin e Fatmir Xhafajt. I ftojmë të protestojmë për largimin nga policia të atyre që ndihmojnë kriminelët si Agron Xhafaj, Habilajt, Balilajt. Ne do t’i themi ndal procesit të zëvendësimit të kriminelëve që i shërbenin Tahirit me ata që i shërbejnë Xhafajt”, theksoi Basha.
“Tani është momenti të mos e shtyjmë më. Ne nuk mund të humbasim më kohën dhe energjitë tona çdo ditë duke u marrë me kriminelin e radhës në politikë. Është koha t’u themi sot ndal të gjithë politikanëve të lidhur me krimin. Është koha që të mbyllim një herë e mirë kapitullin e krimit në Shqipëri. Që të hapim kapitullin e shëndetësisë, të arsimit, të investimeve të huaja, të punësimit”, shtoi kreu demokrat. /tesheshi.com/
