Deputetët e partive opozitare në Kuvendin e Kosovës kanë debatuar gjatë për shkelje të Kushtetutës në riprocedimin e amendamenteve kushtetuese që i hapin rrugë Gjykatës Speciale. Pjesa e parë e debatit të Kuvend në seancën që pritet të miratojë Gjykatën, i është kushtuar zbatimit të Kushtetutës.
Lëvizja Vetëvendosje, përmes deputetes, Albulena Haxhiu, e ka cilësuar riprocedimin e njëjtë të amendamenteve, një cënim të integritetit të Kuvendit dhe të deputetëve.
Haxhiu ka kërkuar dërgimin për vlerësim në Kushtetuese të amendamenteve të riproceduara të Qeverisë. Mirëpo, kreu i Kuvendit e ka hedhur poshtë një propozim të tillë duke thënë se nuk ka shkelje kushtetuese dhe gjykata nuk mund të shqyrtojë dy herë të njëjtin problem.
Shefja e grupit Parlamentar të AAK-së, Donika Kadaj-Bujupi, ka thënë se Kadri Veseli, nuk ka të drejtë që në emër të deputetëve të thërrasë seancë me anë të së cilës shkelet Kushtetuta e Republikës së Kosovës.
Të njëjtin qëndrim ka mbajtur edhe kreu i Nismës, Fatmir Limaj.
Pas secilit koment të opozitës, kanë qenë deputetët e LDK-së që kanë deklaruar se nuk ka arsye që amendamentet të shkojnë në Kushtetuese dhe se opozita nuk duhet ta fshehë pas procedurave votën e saj.
Duket se opozita ka qene e koordinuar për të mbajtur këtë qëndrim në kundërshtim të Speciales, mirëpo kreu i Kuvendit, Veseli pritet të procedojë me votimin. /tesheshi.com/
