Presidenti Meta zbriti në terrenin e përmbytjeve sot, paralel me kreun e opozitës Basha, duke përcjellë nga realiteti i vështirë dhe mesazhet e pritshme politike në goditjen e përqëndruar ndaj mazhorancës.
“Sot isha pranë banorëve të njësisë administrative Sukth, në fshatrat Vadardhë, Rrushkull e Hamallaj, të përmbytura si pasojë e rreshjeve të ditëve të fundit, të cilët veç pasojave të tërmetit dhe pandemisë, po vuajnë nga dëmet e motit të keq dhe mungesa e ndihmës shtetërore.
U informova prej tyre se dalja e lumit Erzen nga shtrati, ka izoluar me dhjetëra familje, shumë prej të cilave me prezencë shqetësuese uji, ka përmbytur mijëra hektarë tokë bujqësore, ka dëmtuar argjinaturat, si dhe ka bllokuar të gjitha kanalet kulluese dhe tumbinot.
I papranueshëm është fakti se këto familje po vuajnë prej ditësh mungesën e ujit të pijshëm dhe rezervave ushqimore, për shkak se asnjë autoritet shtetëror nuk i ka paralajmëruar në kohë për të marrë masat e nevojshme.
Fatura e përmbytjeve nuk duhet të rëndojë mbi qytetarët, të cilët kanë sot nevojë emergjente për shërbime dhe jo për propagandë”, tha Meta.
Jo larg tij qe dhe Basha, sipas të cilit qeveria më shumë se punë ka llafe, e që po ashtu sipas tij, e ka mendjen të darkat në restorante luksoze (referuar rastit “Nusret” në Dubai, ku një ekip qeveritar shkoi aty për një kontratë investimi.
“Për fat të mirë reshjet janë ulur, por situata po vazhdon. Duhet të merren masa, po të ishin bërë investime, nuk do ishte kjo situatë. Fjalë shumë, punë zero apo pak, faturën e paguani ju.
E dyta, ndërkohë që njerëzit janë në këtë situatë, ministrat e qeverisë shtrohen në restoratetet në luksose, kjo është kriminale. Duhet një qeveri që mendon për ju, jo për vete, po kur mendon për vete, punët lihen përgjysmë.
Nëse do mendonin për ju, nuk do ishin në restorantet më luksoze në botë, por do ishin duke dhënë llogari”, tha Basha gjatë një pranie në Sukth, duke biseduar me banorë në hall. /tesheshi.com/
