Konsiderohet si shtetar model, e sektori i tij, ai i Legalizimeve, si më i sukseshmi në qeverisjen Rama. Por Artan Lame, pothuajse asnjëherë i akuzuar nga PD, është gjendur së fundi nën shënjestrën e kësaj të fundit. Ish-deputetja Pampuri doli në një konferencë për shtyp, duke ofruar një audiopërgjim, ku siç e komentoi ajo, Lame kërkon angazhim të vartësve në kuadër të afrimit të fushatës elektorale.
“Pak ditë më parë, Artan Lame, pa u skuqur fare, foli për konkurs të ndershëm në plotësimin e disa dhjetëra vendeve të reja të punës të hapur në ketë agjenci me shtrirje në të gjithë vendin. Por gjithçka është një teatër.
Artan Lame, si gjithë kolegët e tjerë pjesë të qeverisë grabitëse të Edi Ramës, nuk mund të organizojnë konkurse të ndershme. Ata dinë vetëm të punësojnë militantë partiakë, që i përdorin në zgjedhje në shkelje të ligjit ndaj kundërshtarit politik. Artan Lame është modeli tipik i kësaj skeme skandaloze që ka mbajtur peng administratën publike gjithë keto vite, duke punësuar militantë që vijnë me lista nga partia në pushtet dhe, në vend t’u shërbejnë qytetarëve, i shërbejnë partisë në pushtet në kohë fushatash elektorale.
Rreth një vit më parë, kjo u provua me një material autentik, të publikuar në media, ku Artan Lame dëgjohet që pranon ndërhyrjen e deputetëve socialistë për marrjen në punë të militantëve dhe përdorimin e tyre gjatë fushatës”, tha Pampuri.
Sipas saj, “Artan Lame i thotë stafit se janë dy muaj para zgjedhjeve dhe kërkon ndihmën e mbështetjen e tyre për legalizimet. Lame kërkon të punohet edhe ditën e shtunë gjatë kësaj periudhë zgjedhore, në të kundërt siç ai shprehet do të njoftojë ministra ose deputetë të sjellin në atë vend pune persona të tjerë”. PD thotë se kjo është një provë për emërimet politike në administratë. /tesheshi.com/
