Opozita e ka bërë fakt paralajmërimin se do të padiste ligjërisht zgjedhjet e 18 qershorit dhe pse ajo vetë ka zgjedhur të rrijë jashtë këtyre zgjedhjeve.
Ankimimi është bërë sot ku cilësohet i paligjshëm vendimi i KQZ-së për të pranuar listat e kandidatëve të subjekteve zgjedhore të regjistruara në këto zgjedhje.
Kërkesa për kolegjin zgjedhor mban firmën e Partisë Agrare Ambjentaliste e drejtuar nga aleati i Bashës, Agron Duka. Arsyeja pse ankesa ka vetëm firmën e PAA-së është juridike, pasi vetëm ky subjekt rezulton i regjistruar në zgjedhje dhe pse më pas u tërhoq për të qëndruar jashtë zgjedhjeve, ashtu si pjesa tjetër e opozitës.
Argumenti i ankimimit është se listat e kandidatëve janë dorëzuar jashtë afateve ligjore, pasi data përfundimtare ka qënë 28 prilli në orën 24:00 dhe jo 29 prilli, ditë kur janë pranuar nga KQZ-ja këto lista.
Më herët kreu i PD-së Lulzim Basha tha se “procesi i zgjedhjeve të 18 qershorit përveçse dështoi politikisht e moralisht, dështoi edhe ligjërisht. Të gjithë e dinë, të gjithë dini të numëroni deri në 50, në çdo listë, absolutisht çdo listë e dorëzuar në KQZ është e jashtëligjshme, procesi është në kolaps ligjor. Dy rrugë ka, Kolegji Zgjedhor do të ballafaqohet së shpejti me kërkesën për të hedhur poshtë 18 Qershorin dhe listat e paligjshme, duke hedhur poshtë sipas ligjit të Republikës së vjetër do ti japë një shans Republikës së vjetër ta përfundojë misionin e saj ,përmes konsensusit dhe negociatave. Në qoftëse me presione apo zhage Kolegji zgjedhor vendos tu thotë shqiptarëve se 17 plus 31 plus 2 bëjnë 51dhe jo 50, atëherë Kolegji zgjedhor, ligji zgjedhor dhe Kushtetuta e Republikës së vjetër do të merren përpara nga bashkimi i shqiptarëve për Republikën e Re”./tesheshi.com
