Opozita shqiptare ka nisur përgatitjet për protestat e paralajmëruara kundër qeverisë Rama. Selinë blu, e vizituan në mbrëmje dyshja e LSI-së, Kryemadhi-Vasili, ndërkohë që kreu demokrat Basha ka planifikuar paraditen e së hënës një takim me aleatët.
Është interesante se si do i qaset ftesës kreu i PAA-së, Agron Duka, i cili nga ana e tij jo vetëm refuzoi të ishte pjesëmarrës në protestat kundër Prokurorit të Përkohshëm para parlamentit, por dhe po tenton të firmojë një grupim të ri politik opozitar, ku veçon dhe prania e Blushit me LIBRA-n e tij anemike, edhe nga ikja e koleges Hafizi.
Mendohet që protestat e opozitës të startojnë më 15 janar. Ato llogariten si një “çadër nr.2”, edhe nëse realisht nuk flitet për një ngritjen e një të tillë në shesh.
Kryeministri Rama nga ana e tij, i ka tentuar t’i intimidojë ato ende pa nisur duke i konsideruar si një përpjekje e radhës për pengimin e reformës në drejtësi.
Për momentin, shefi i mazhorancës nuk shfaq asnjë shqetësim për aksionet opozitare, duke u ndjerë komod nga mbështetja ndërkombëtare që ka. Madje dhe në përshtypjen e këtyre të fundit, reagimet opozitare, përfshirë dhe çadrën 2-mujore të opozitës, kishin si arsye pengimin e vettingut. /tesheshi.com/
