Opozita shqiptare e ka braktisur Kuvendin kësaj here jo për dekriminalizimin – i cili mori më në fund konsensus – por për dekusarizimin, siç tha ish-kreu i PD-së, Berisha, e cila duket se do jetë kauza e re e të djathtëve.
“Nuk mund të qëndrojmë në këtë sallë pa largimin e deputetëve që vjedhin fondet publike duke përdorur statusin e deputetit”, tha deputeti demokrat Eduard Halimi, pa cituar ndonjë emër konkret se për kë është fjala sipas gjykimit të tyre.
“Axhenda jonë është dekusarizimi, një axhendë që është në interesin jetik të çdo foshnje, nëne, çdo prindi, çdo fëmije, çdo të moshuari, sepse janë kusarët këtu në Parlament që po thithin si shushunja gjakun e të varfërve shqiptarë duke përdorur imunitetin e Parlamentit”, tha më pas dhe Berisha, por dhe ai nuk përmendi asnjë emër deputeti, që sipas tij është kusar. /tesheshi.com/
