Me sloganet “Me hajna nuk ka shtet”, “Hajnat në burg jo në qeveri”, u organizua sot protesta e paralajmëruar nga tri partitë opozitare: LVV, AAK dhe NISMA.
Protestuesit u tubuan te sheshi “Zahir Pajazit” dhe nga aty filluan “Marshutën” drejt Gjykatës Kushtetuese. Të prirë nga liderët e tri partive, protestuesit arrijnë të Gjykata Kushtetuese. Këtu anëtari i AAK-së, Riza Smaka, ju drejtohet me një fjalim i cili thotë se kjo gjykatë nuk e ka kryer punën e vet. Derisa fliste para protestuesve z. Smaka, një grup protestuesish në mënyrë simbolike kanë hedhur ngjyrë ngjyrë të zezë mbi objektin e Gjykatës Kushtetuese. Me të përfunduar aksionin simbolik te Gjykata Kushtetuese, ku muret dhe rrethojat e saj u ngjyrosën me të zezë, protestuesit vazhduan marshin drejt ndërtesës së KEDS-it.
Në çdo institucion ishin të stacionuara një numër i madh i forcave të Policisë të cilët ishin të armatosur dhe në gjendje gatishmërie. Me të mbërritur protestuesit të ndërtesa e KEDS-it, ata kryen një aksion simbolik ku në fillim hasen në rezistencë të Policisë, por protestuesit ju bënë thirrje publike që t’i lejojnë ta kryejnë në mënyrë paqësore ketë aksion dhe ashtu e përfunduan pa asnjë incident ku është lejuar të hyjë një person, i cili ka thyer një orë digjitale.
Protestuesit thanë se kjo është hajni digjitale. Aty të pranishmeve ju drejtua anëtari i NISMA-së i cili thotë se qytetarët e Kosovës paguajnë 50 për qind më shtrenjtë rrymën se sa qytetarët e rajonit.
Protestuesit nga ndërtesa e KEDS-it nisën për të televizioni publik RTK.
Ata vazhdimisht brohorisnin për shkarkimin e menaxhmentit të RTK-së, dhe “RTK është e jona, jo e Kadri Veselit”, “RTK e jona, jo e qeverisë”.
Me të mbërritur tek RTK-ja masës ju drejtua deputetja e VV-së, Albulena Haxhiu, e cila tha: “jemi mbledhur që të kundërshtojmë menaxhimin e RTK-së i cili është në shërbim të interesave partiake.” Pas përfundimit të fjalimit dhe aksionit simbolik te RTK-ja, protestuesit janë nisur drejt Qeverisë së Kosovës.
Para masës së grumbulluar te ndërtesa e Qeverisë së Kosovës, ka folur kreu Nismës, Fatmir Limaj, i cili tha se protesta e sotme është e qetë dhe po dëshmon se kush po përdor dhunë.
“Sot jemi bashkuar të gjithë për t’i thënë stop keq everisjes dhe kapjes së shtetit”, po ashtu “Ftojmë të gjithë ata që i kanë votuar dy partitë në pushtet, që t’ia marrin votën, sepse votën ua morën me mashtrime”, ju drejtua Limaj, i cili tha se Kushtetuta e Kosovës është Kushtetuta e Enver Hasani.
Ndërsa lideri i AAK-së, Ramush Haradinaj, ka thënë se shteti është kapur në emër të votës së fituar në zgjedhje. Ai ka thënë se Qeveria e Kosovës i ka dy javë kohë për përmbushjen e kërkesave të Opozitës. “Ne s’do të ndalemi”, ka thënë Haradinaj, në fjalimin e mbajtur para protestuesve.
Haradinaj ka thënë se janë për rritjen e pagave dhe zhvillimit ekonomik, por po i thonë “jo” korrupsionit dhe krimit ekonomik. “U themi jo monopoleve në Kosovë. Po e shkatërrojnë ekonominë”, ka thënë ai.
Kurse në fund masës ju drejtua edhe lideri i VV-së Visar Ymeri, i cili thotë: Se nuk do të lejojnë që SHIK-u dhe agjentët e tij të kërcënojnë qytetarët e Kosovës.
“Thaçi e Mustafa nuk kundërshtojnë asnjëherë Serbinë e ndërkombëtaret e tash kërcënojnë protestuesit, sepse këta nuk janë burra shteti por burrec pushteti”, ka thënë ai. Dhe në fund ju drejtua Qeverisë së Kosovës me një ultimatum i cili thotë: keni dy javë kohë për përmbushjen e kërkesave të Opozitës dhe e ka shpallur të përfunduar protestën e sotme. Ndërkohë, ka filluar një shi që shumë shpejt po shpërndahen e protestuesit. Ashtu siç filloi, protesta edhe përfundoi në mënyrë paqësore. /tesheshi.com/
