Opozita shqiptare ka marrë vendim që jo vetëm t’i bojkotojë zgjedhjet e pjesshme lokale në Kavajë, por atë ditë që ato zhvillohen, më 7 maj, në këtë qytet ajo të organizojë në mënyrë sfiduese një protestë, siç e quan ajo kombëtare.
Kjo është bërë me dije së fundi nga kreu i PD-së, Basha. Vendimi është rrjedhojë e një proteste të pazakontë që opozita ka ndërmarrë prej gati dy muajsh, duke ngritur një çadër para kryeministrisë, të quajtur si “e lirisë”.
Që aty, çdo ditë kërkohet largimi i qeverisë “Rama” dhe zëvëndësimi i saj me një qeveri teknike, me arsyetimin se vetëm kështu zgjedhjet do jenë të garantuara nga kërcënimi i drogës dhe i krimit.
Kujtojmë se Kavaja është mbajtur si bastion demokrat në vite, deri kur në zgjedhjet lokale të 2001-shit, votoi për PS-në. /tesheshi.com/
