Protesta e opozitës ka agravuar më tej, pasi policia arrestoi Sekretarin Organizativ të PD-së, Sait Dollapi. Kjo ka bërë që masa militante të drejtohet kah Drejtoria e Policisë, nën thirrjet e kreut Basha.
“Me urdhër të Edi Ramës dhe Sandër Lleshajt është dhunuar në mënyrën më barbare të mundshme. Është shoqëruar në drejtorinë e policisë. Ju bëj thirrje gjithëve ju që të na ndiqni në drejtim të Policisë së Tiranës”, tha Basha.
Nga ana tjetër, duke referuar një numri policësh të plagosur, Rama reagoi duke u shprehur: “Respekt për trupat e Policisë së Shtetit që me profesionalizmin e tyre nderuan uniformën e shtetit përballë një turme të udhëhequr nga dëshpërimi i politikës qorre. Shërim të shpejtë për policët e plagosur dhe ndëshkim për dhunuesit e tyre e për zjarrvënësit e institucioneve”.
Një tjetër reagim pati dhe presidenti Meta, ku, duke iu referuar përplasjes te Drejtoria e Policisë, apeloi:
“I bëj thirrje sërish të gjithë individëve që të distancohen nga aktet e dhunës dhe Policisë së Shtetit të ruajë qetësinë dhe të evitojë përdorimin e panevojshëm të dhunës ndaj protestuesve”.
Duke kërkuar lirimin e Sekretarit Dollapi, protestuesit e përflakën dhe ambientin para Drejtorisë së Policië, ku forca të shumta policore janë dislokuar për t’u përballur me situatën.
Ndalimi e më pas shoqërimi i Sait Dollapit, është bërë me pretendimin se ai ka qenë organizatori i akteve të dhunës gjatë protestës, që nga Kryeministria e më pas te Parlamenti. /tesheshi.com/
