Opozita e nisi sezonin e ri politik, bashkangjitur atij parlamentar, jo nga parlamenti në Tiranë por nga Shkodra. Zgjedhja ka qenë me një mesazh të qartë: krimi po na vë përpara dhe duhet ta ndalim.
“Para disa ditësh, krimi i organizuar goditi me breshëri automatiku shtëpinë ku flinin fëmijët e një gazetareje. Janë rrëmbyer dhe zhdukur qytetarë, janë vrarë të tjerë, siç ishte rasti i Arjan Ferracakut. Sot Dobraçi duhet të ishte tërësisht nën kontrollin e policisë, por në fakt është shtetrrethim i vërtetë kriminal ku rojet private të armatosur vendosin kush lëviz dhe kush jo. Në një lagje të Shkodrës nuk lëviz dot lirisht sikur të ishim në gjendje të luftës. Në gjunjë është edhe policia e Shkodrës. I bëj thirrje drejtorit të policisë së Shkodrës të japë dorëheqjen. E vetmja që të shpëton nga përgjegjshmëria morale dhe ligjore është largimi yt. Krimi u ka marrë kalanë nga brenda, u ka marrë Fatmir Xhafajn, kampionin e reformës në drejtësi”, theksoi Basha.
Sipas tij, Shqipëria dhe shqiptarët duhen shpëtuar.
“Sfidat që kemi përpara ka përmasa akute. Shqipëria nuk mund ta durojë më këtë gjendje. Nuk mund ta lëmë vendin të boshatiset. Çdo ditë shkojmë prapa dhe jo para në raport me Evropën. Vetëm ata që ia kanë shitur krimit shpirtin për jetën e tyre me luks, me chartera privatë si Edi Rama, Taulant Balla dhe Arben Ahmetaj me shokë mund të pranojnë që të boshatisen qytete të tëra”, theksoi kreu demokrat.
Basha hodhi poshtë çdo ftesë për bashkëpunim parlamentar, ardhur nga mazhoranca. /tesheshi.com/
