Opozita maqedonase: ja hilja e fundit e Gruevskit

Plani për riformatimin e qeverisë duke formuar komision anketues në parlament që do të zgjidhte krizën politike në Maqedoni, konsiderohet si  një hile e Gruevskit- kështu e vlerëson opozita.  Qëndrimi i LSDM-së vjen pasi një ditë më herët televizioni “Nova Tv” nga Shkupi publikoi informacionin se palët janë shumë afër  gjetjes së zgjidhjes për ngërçin politik me ndërmejtësim të Brukselit zyrtar, për çka u tha se janë dakorduar që LSDM të kthehet në Parlament, të formohet komision anketues, ndërsa për ketë kryeministri Gruevski të shkarkojë ministrat të cilët u ekspozuan në aferën e përgjimeve.

“Gruevski ka promovuar këtë hile në Bruksel, për çka si duket ka fituar përkrahje të qarqeve të caktuara, por kjo nuk është pjesë e negociatave”, thonë burime partiake brenda LSDM-së.

Ndërkohë, një zyrtarë i BDI-së  në kushte anonimiteti konfirmon se Gruevski vërtetë ka ofruar të sakrifikojë ministrat, menjëherë pas kongresit që do të mbahet më 2 dhe 3 maj, dhe t`i zëvendësojë me njerëz të kapshëm edhe për opozitën, por vetëm nëse LSDM kthehet në parlament. /tesheshi.com/