Opozita kosovare vazhdon bojkotin e komisioneve parlamentare

Komisionet parlamentare, po vazhdojnë të mbahen pa prezencën e anëtarëve nga partitë opozitare në Kosovë.

Pa anëtarët e opozitës, vazhdoi punën sot dhe Komisioni për Legjislacion, Mandate dhe Imunitete, kryetare e së cilit është deputetja nga VV Albulena Haxhiu.

Në mungesë të saj, mbledhjen e parë për vitin 2016, e drejtoi nënkryetarja e komisionit Selvije Halimi nga PDK e cila i bëri thirrje kolegëve opozitarë të këtij komisioni, që t’i kthehen Kuvendit dhe komisioneve parlamentare.

Edhe Agim Aliu, anëtar i Komisionit nga radhët e PDK-së, tha se rrethanat në të cilat kanë punuar vitin e kaluar, po barten dhe në këtë vit, duke mos dhënë shpresë për një punë normale të komisioneve.

Kurse, Albulena Haxhiu, e cila në kohën sa Komisioni po mbahej ndodhej në ndërtesë të Kuvendit. Ajo tha se do të vazhdojnë që t’i bojkotojnë komisionet, ashtu siç do të vazhdojnë ta pengojnë dhe seancat parlamentare, me mënyra të njëjta, e ndoshta duke i kombinuar dhe me mënyra tjera, deri në dorëheqjen Qeverisë.

Haxhiu, tha se është e rëndësishme që të mos thirret seanca e Kuvendit, por të reflektohet për situatën e krijuar.

/tesheshi.com/