Nga Blendi Gashi
Tri partitë opozitare, Lëvizja ‘Vetëvendosje’, Aleanca për Ardhmërinë e Kosovës dhe Nisma për Kosovën kanë deklaruar se nuk do ta lejojnë vazhdimin e seancës plenare, nëse kryeministri Isa Mustafa nuk vjen për të raportuar në seancë për marrëveshjet me Serbinë.
Deputetë të opozitës, Donika Kadaj, Visar Ymeri, Glauk Konjufca, Fisnik Ismaili, Faton Topalli, Aida Dërguti dhe Albin Kurti, për disa minuta kanë qëndruar në këmbë para ulëses së kryeparlametarit, duke mos lejuar udhëheqësin e séances, Sabri Hamiti, të hedh në votim kërkesën e bërë nga Lidhja Demokratike e Kosovës që raportimi i Mustafës të shtyhet për javën e ardhshme më datë 22 shtator.
“10 minuta pushim se këta zotnitë po kanë qef me nejt këtu”, ka thënë Hamiti, duke iu adresuar deputetëve të opozitës.
Sabri Hamiti është kthyer në kryesimin e seancës së Kuvendit të Kosovës, për ta përfunduar punimet e saj. Kur ishte kthyer Hamiti, nënkryetarja Aida Durguti nuk ia lëshoi ulësen, duke e detyruar Hamitin që përfundimin e seancës ta shpallë në këmbë.
Kësisoj, kryesia e Kuvendit të Kosovës do të mblidhet të hënën, për të vendosur për vazhdimin e saj.
Opozita: Isa Mustafa përgjegjësi kryesor për Zajednicën
Kryetari i grupit parlamentar të LDK-së, Ismet Beqiri, ka thënë se me kërkesë të kryeministrit Mustafa kërkon që të shtyhet raportimi për 22 shtator duke filluar nga ora 11:00.
Kërkesën për shtyrje të debatit e ka përkrahur edhe grupi parlamentar i PDK-së. “Grupi i PDK-së mbështet mocionin që të shtyhet për javën e ardhshme”, ka deklaruar deputeti Elmi Reçica.
Deputeti i AAK-së Ramush Haradinaj, ka deklaruar se mosardhja e Mustafës nënkupton se diçka është duke u fshehur dhe se po i vjen era mjaftueshëm kësaj pune.
“Ne e kemi ngritur alarmin që Asociacioni i Komunave me shumicë serbe ka me u pajisë me kompetenca ekzekutive, dhe është pajisë me kompetenca vendimarrëse shumë më shumë se ekzekutive. Le ta tërheq nënshkrimin ku e ka vendosur dhe pa e tërheq këtë nënshkrim nuk ka normalitet as në Parlament as në Kosovë”, deklaroi Haradinaj.
Kryetari i Grupit Parlamentar të Lëvizjes “Vetëvendosje”, Glauk Konjufca, tha se vet kryeministri e ka kërkuar këtë informim dhe pikërisht ai vet nuk vjen ai të ballafaqohet me opizitën. Arsyeja e kryeministrit është banale pasi thotë se nuk e ka zëvendësin e tij, Hashim Thaçi.
“Isa Mustafa nuk e ka këtu zëvendësin dhe nuk mund të vij në Kuvend. Kjo është skandaloze. E kemi afër Kuvendit vetëm 100 metra. Nënshkrimi për Zajednicën e ka dhënë Isa Mustafa. Si grupe parlamentare do ta pamundësojmë vazhdimin e mëtejmë të seancën nëse Isa Mustafa nuk vjen të flas për marrëveshjet me Serbinë. Ai vet e ka kërkuar këtë pikë dhe në jemi përgatit këtë pikë. Hashim Thaçi e ka themelu Zajedinciën, por Isa Mustafa e ka gatu, ai e ka qit nënshkrimin dhe ai e ka përgjegjësinë dhe Isa Mustafën jemi duke e pritur me ardh në Kuvend”, ka deklaruat Konjufca.
Valdete Bajrami nga partia NISMA për Kosovën ka thënë se është keq se si po fillon sezoni vjeshtor me mosardhjen e kryeministrit dhe ministrave në seancë.
“Dhe të vijë një kërkesë e kryeministrit për tërheqje për këtë pike është e paarseyshme dhe ai duhet të vijë të raportojë apo të heq dorë kret prej Qeverisë të thotë se nuk është në gjendje të udhëheq vendin”, ka deklaruar Bajrami. /tesheshi.com/
