Ndërsa çështja e demarkimit të kufirit me Malin e Zi vazhdon të mbetet e pazgjidhur, kryeministri i Kosovës, Isa Mustafa ka paralajmëruar fillimin e një raundi bisedimesh me opozitën dhe me Listën Serbe për sqarimin e të gjitha dilemave para se të ri-procedohet për në kuvend, projektligji për Demarkacionin.
Takimi eventual mes partive në pushtet PDK-LDK, “Srspka”, dhe atyre në opozitë VV, AAK e NISMA parashihet të mbahen javën e ardhshme. Të paktën kështu kanë deklaruar zyrtarë të qeverisë “Mustafa”, por pa saktësuar ndonjë datë.
Faton Abdullahu, këshilltar i kryeministrit Isa Mustafa,thotë se oferta për të biseduar është serioze dhe ka për qëllim ballafaqimin e fakteve.
“Nuk duhet vështruar, analizuar, këtë ftesë në bazë të asaj se kush do të lëvizë nga pozicioni, kush do ta kthej çështjen në pikën zero e të tjera të kësaj natyre. Jo. Çështje kryesore është sjellja e fakteve. Argumentet janë ato që e rrëzojnë çfarëdo kokëfortësie në çfarëo ane që mund të ekzistojë”, tha Abdullahu për Radio Kosovën.
Edhe pse partive opozitare ftesa nga kryeministri ende nuk ju ka shkuar në derë (gjë që pritet të ndodh në fund të kësaj jave, ose në fillim të javës së ardhshme), opozitarët, kanë një paralajmërim të qartë për kryeministrin Mustafa.
Tri partitë opozitare, Vetëvendosje, AAK dhe NISMA thonë se janë të gatshme të ulen në një tryezë me kryeministrin Mustafa, vetëm nëse Demarkacioni rikthehet në pikën zero, por në të kundërtën do ta refuzojnë kreun e qeverisë.
Deputeti i Vetëvendosje-s, Ismajl Kurteshi, thotë lëvizja nuk ka ndërruar qëndrim sa i përket çështjes së Demarkacionit, dhe se nuk ulet në një tavolinë me kryeministrin Mustafa pa rënë poshtë version aktual i demarkimit të kufirit me Malin e Zi.
“Bisedimet për VV-në nuk ekzistiojnë nëse qeveria nuk është e interesuar që të heq dorë nga forma aktuale e Demarkacionit të cilën ata po e propozojnë.
VV është për një demarkim ku kufiri caktohet aty ku e ka vendin, pra ku ka qenë më herët.
Procesi duhet të rikthehet në fillim, pra me tërheqje të nënshkrimit ose me marrëveshje të subjekteve politike pozitë dhe opozitë që të vije në Kuvend të rrëzohet dhe mandej të fillon edhe një herë nga fillimi. Ta bëj të qartë se Lëvizja Vetëvendosje nuk ka lëvizur asnjë millimeter nga pozicioni që e ka pasur edhe para një viti lidhur me këtë çështje. Nuk bëjmë pazare me tokat e Kosovës”, ka thënë Kurteshi, për tesheshi.com
Deputeti i AAK-së, Bali Muharremaj, thotë se Aleanca e ka bërë të qartë me kohë qëndrimin e saj sa i përket deklarimeve të kryeministrit për mundësinë e uljes në një tryezë me opozitën për të gjetur një zgjidhje për marrëveshjen e Demarkacionit.
“Ne nuk do të jemi në asnjë ‘tavolinë’ të bisedimeve me askënd i cili tenton ta shtyjë përpara versionin e tanishëm të kësaj marrëveshjeje. Kjo marrëveshje duhet të vlerësohet edhe nga të tjerët e ‘vdekur’ dhe pastaj të shikohet për një rifillim nga pika zero për të kthyer kufirin aty ku ka qenë”, ka thënë Muharremaj, për tesheshi.com.
Bilall Sherifi, sekretar i partisë NISMA për Kosovën ka thënë se nëse kryeministri kërkon takim me opozitën për ta ndihmuar atë që ta rrëzojmë bashkë marrëveshjen për Demarkacionin, atëherë për hirë të interesave të Kosovës do t’i përgjigjeshim pozitivisht ftesës për takim.
Por, Sherifi, paralajmëron se në asnjë rast tjetër nuk do të shkojnë në një takim me Mustafën në rast se ky takim do të kishte për qëllim legjitimimin e marrëveshjes aktuale.
“Ky version i marrëveshjes nuk kalon prandaj qeveria nuk ka alternativë tjetër përveç tërheqjes nga marrëveshja“, ka deklaruar Sherifi.
Edhe njëri nga kundërshtarët më të mëdhenj të versionit aktual të demarkacionit me Malin e Zi, Shpejtim Bulliqi, shprehet pesimist rreth tryezës se liderëve, e cila pritet të mbahet menjëherë pas kthimit të kryeministrit Mustafa nga vizita e tij në ShBA.
Deputeti i LDK-së, thotë se nuk pret shumë rezultate për faktin se kjo nuk është çështje politike, por është çështje tipike profesionale.
Ndryshe, edhe komisioneri evropian për politika të fqinjësisë dhe negociata të zgjerimit, Johannes Hahn më 17 maj të këtij viti uli në një tryezë liderët politik për të gjetur një zgjidhje për ngërçin politik, por një gjë e tillë nuk ndodhi. /tesheshi.com/
