Nga Blendi Gashi
Partitë opozitare edhe në manifestimin e radhës të mbajtur në Pejë kanë kërkuar nga qeveria të tërheqë nënshkrimet për Asociacionin dhe Demarkacionin. Për dallim nga qytetet e tjera, sot opozita e bashkuar ka kërkuar nga Amerika të ndihmojë në anulimin e këtyre marrëveshjeve.
Kreu i AAK-së, Ramush Haradinaj, deklaroi para qytetarëve se Peja është vend i lirisë së njerëzve të lirë që janë flijuar shumë për këtë liri.
“Si njerëz të mirë në Dukagjin jo vetëm që jemi të lirë por duam që të gjithë të jenë të lirë komunitetet, edhe qytetarët serb të jenë të lirë në Kosovë por ne nuk e lejojmë Serbinë me u kthy në Kosovë”, tha Haradinaj.
Ai ka një lutje për Amerikën e cila sipas tij duhet ta ndihmojë vendin që të ndalojnë këto marrëveshje të dëmshme për Kosovën.
“Kërkojmë nga Amerika të ecim të lirë si shtet sovran”, tha Haradinaj.
Ai u ka dërguar porosi edhe policisë dhe atyre që janë në qeveri.
“Kam një mesazh për ata që marrin rrogë prej Hashimit e Isës, qofshin ata ministra a çka do qoftë, mos harroni se shefat e juaj do iu marrin në qafë dhe për këtë thuani “Jo” shefave të juaj se rrogëtarët nuk i duhen askujt”, tha Haradinaj.
Ymeri: Populli po i thotë jo marrëveshjeve të Mustafës e Thaçit
Kryetari i VV-së, Visar Ymeri, duke iu drejtuar të pranishmëve në tubim tha se qytetarët që po mblidhen në qendrat e Kosovës po i thonë “Jo” marrëveshjeve të Mustafës e Thaçit me Serbinë e Malin e Zi.
“Të gjithë ata protestues në Gjakovë, Prishtinë e Gjilan e sot këtu në Pejë po i thonë Hashimit e Isës se me popullin nuk luajnë më, dhe se “Zajednica” e Demarkacioni nuk kalojnë më”, thaYmeri.
Jakup Krasniqi kërkon dorëheqjen e Thaçit dhe Mustafës
Në mungesë të liderit të NISMA-s, Fatmir Limaj mbështetësve të opozitës në qytetin e Pejës u është drejtuar Jakup Krasniqi. Ai tha se opozita e bashkuar sot është mbledhë në qytetin e besa-besës.
Krasniqi ka thënë se sot ne i kemi 1001 arsye për të protestuar kundër kësaj qeverie që i ka sjellë shumë dëme Kosovës.
“Nëse Isa e Hashimi kanë toka për të falur le ti falin të tyret e jo të Kosovës”, tha Krasniqi, duke kërkuar dorëheqjen e tyre.
/tesheshi.com/
