Nga Blendi Gashi
Opozita kosovare, me iniciativë të kreut të NISMA-s, Fatmir Limaj, ka paralajmëruar se javën e ardhshme do të aktivizohet për të nisur mbledhjen e nënshkrimeve që duhen për të shkarkuar qeverinë.
Për jetësimin e kësaj nisme duhen 40 nënshkrime të deputetëve, të cilat opozita pa ndihmën e kolegëve të mazhorancës nuk mund t’i arrijnë.
Por shefja e grupit parlamentar e NISMA-s, Valdete Bajrami shprehet e bindur se deri në fund të javës së ardhshme do mund t’i kenë të gjitha nënshkrimet e nevojshme që pastaj ta procedojnë tutje kërkesën për mocion.
Ajo ka bërë të ditur për mediat kosovare se të hënën do të mblidhen shefat e grupeve parlamentare të opozitës për t’u dakorduar dhe për t’i harmonizuar qëndrimet për çështjen në fjalë, duke përfshirë edhe mbledhjen e nënshkrimeve.
Dy partitë tjera opozitare, Vetëvendosje e AAK shprehin mbështetjen e tyre për nismën e ndërmarrë nga Limaj, me shpresën që ky i fundit t’i ketë bërë mirë llogaritë pasi thonë se përballë kanë një koalicion qeverisës që ka mbi 80 vota.
Deputeti i Vetëvendosje-s, Rexhep Selimi thotë se inicitiva e Limajt nuk është ide e re pasi është bërë edhe para dy vitesh; por si një nevojë për të shkuar drejt zgjedhjeve për rrëzimin e qeverisës.
“Është e kuptueshme edhe i pritshë qëndrimi i Lëvizjes Vetëvendosje sa i përket kundërshtimit të saj ndaj qeverisë. Në ndërkohë opozita ka bashkëvepruar në temat kyçe si; Demarkacionime Malin e Zi, kundër ‘Zajednicës’ si marrëveshje, kundër qeverisë në përgjithësi, andaj do jetë unike edhe në rast të procedimit të mocionit të mosbesimit në seancat e ardhshme. E di edhe nevojën se sa numra duhen për rrëzimin e një qeverie me mocion mosbesimi, kështu që përgjigjet tjera mund t’i kërkojmë nga Limaj, por sido që të jetë qëndrimi i Vetëvendosje-s është i kuptueshëm se jemi kundër kësaj qeverie dhe hapjes së mundësisë për shkuarje në zgjedhje të parakohshme si zgjidhja e vetme”, thotë Selimi për tesheshi.com.
I pyetur se a pret të kalojë mocioni në fjalë veç nëse arrihet të futet në rend dite në një nga seancat plenare, Selimi pohon se janë të vetëdijshëm se përballë kanë numerikisht një mazhorancë të madhe, dhe për raportet mes partnerëve të koalicionit, ku deputetë të caktuar janë shprehur kundër qeverisë, por shpreson që Limaj të ketë llogaritur përtej numrave të opozitës.
Pal Lekaj, kryetar i grupit parlamentar të AAK-së, thotë se të gjitha zhvillimet në vend dërgojnë drejt rrugës që duhet të ketë zgjedhje sa ma parë.
Sipas tij, qeveria e sotme është mashtrim për vendin pasi asnjë detyrë a premtim nuk e ka realizuar.
“Prandaj, iniciativa për t’u rrëzuar kjo qeveri duhet të mbështetet dhe besoj që deputetët e kanë kuptuar tashmë situatën e rëndë në Kosovë e pa dallim partie a koncepti do t’i thonë po një mocioni të mundshëm për mosbesimi ndaj qeverisë, e kështu do t’i hapim rrugën që qytetarët ta thonë fjalën e tyre përmes zgjedhjeve”, thotë Lekaj për tesheshi. com.
Analisti politik, Faik Krasniqi mendon se nisma e opozitës do të dështoi nëse nuk gjen përkrahje edhe nga deputetë të caktuar të mazhorancës.
“Opozita nuk ka fuqi që ta rrëzojë qeverinë, sepse i mungojnë votat. Rrëzimin e qeverisë përmes mocionit të ngritur kundër saj, do të mund ta bënte vetëm nëse do të kishte përkrahjen e gjysmës së deputetëve të PDK-së dhe të minoriteteve. Prandaj, këtë nismë e shohë të dështuar nëse nuk do të kenë përkrahjen edhe të PDK-së”, thotë Krasniqi për tesheshi. com, i cili shton se iniciativa në fjalë mund të gjejë mbështetje vetëm tek disa deputet të mazhorancës që haptaz janë kundër prishjes së koalicionit.
Portali ynë ka tentuar të marrë dhe një qëndrim nga mazhoranca për temën në fjalë, saktësisht nëse i frikësohen mocionit eventual të opozitës, por janë përgjigjur në thirrjet telefonike dhe mesazhet e dërguara.
Kujtojmë se për zgjedhje të parakohshme janë shprehur edhe disa nga deputetët e pozitës e në veçanti ata nga PDK, Shaip Muja, Shukri Buja dhe Nait Hasani tash e disa javë edhe publikisht kanë kërkuar që të prishet koalicioni LDK-PDK dhe vendi të shkojë në zgjedhje.
Ndërsa në rast se mocioni i merr 61 e më shumë vota, atëherë qeveria konsiderohet e shkarkuar dhe vendi shkon në zgjedhje të jashtëzakonshme.
Rregullorja e Kuvendit: Neni 30 – Mocioni i mosbesimit për Kryeministrin
Me propozimin e një të tretës (1/3), përkatësisht të 40 deputetëve të Kuvendit, mund të merret mocioni i mosbesimit për Kryeministrin.
Mocioni i mosbesimit, i nënshkruar nga së paku një e treta (1/3), përkatësisht nga 40 deputetë, pranohet kur për të voton shumica e të gjithë deputeteve të Kuvendit.
Mocioni i mosbesimit vihet në rendin e ditës, jo me vonë se pesë (5) ditë dhe jo më herët se dy (2) ditë nga dita e parashtrimit të tij.
Nëse mocioni i mosbesimit votohet për Qeverinë në tërësi, Qeveria konsiderohet në dorëheqje.
Nëse mocioni i mosbesimit dështon, një mocion tjetër i mosbesimit mund të parashtrohet vetëm pas nëntëdhjetë (90) ditëve të ardhshme. /tesheshi.com/
