Ka përfunduar në mënyrë të qetë manifestimi i organizuar sot në Gjakovë, përmes të cilit u kërkua anulimi i dy marrëveshjeve që Prishtina ka arritur në Bruksel me Beogradin.
Të tre liderët opozitarë të cilët folën në këtë manifestim deklaruan se askush nuk mund t’’ua mbyll gojën dhe se marrëveshjet nuk kalojnë.
Lideri i VV-së, Visar Ymeri tha se ne nuk heshtim e as qytetarët nuk frikësohen.
“Republika as nuk e pranon as “Zajdenicën” e as faljen e tokave. Gjakova i tha e para Jabllanovicit shporru dhe ai u shporr. Sot, Gjakova po i thotë jo marrëveshjeve dhe ato natyrisht nuk do të kalojnë”, ka thënë Ymeri.
Kreu i AAK-së Ramush Haradinaj u shpreh se pushtetarët e korruptuar, e kanë dërmuar qytetarin, familjen, lirinë, dhe po e rrezikojnë shtetin.
“Ne jemi evropianë dhe e nderojmë mikun e përjetshëm- Amerikën. Pse Kosova sot është “e përulur dhe e turpëruar”, “e lodhur dhe ekonomikisht e dërmuar”. Një Kosovë me kaq shumë potenicale njerëzore e natyrore.
Pushteti i korruptuar, na ka nxjerr në rrugë, sepse po don ta bëjë Serbinë Zot shtëpie në Kosovë. Na ka detyru me përdor gaz, se po don me i falë tokë Malit të Zi. Ne i themi JO, se Kosova është një e nuk bëhet dy.
Pushteti po na burgosë. Të burgosurit politik dhe përjashtimi i opozitës po na kthejnë në të kaluarën e hidhur. Po na i thyejn dyert e shtëpive dhe zyrat e punës, vetëm me u pajtu me marrëveshjet e tyre. Ne u themi JO. Nuk kemi as tokë me falë e as nuk e kemi ndërmend ta lejojmë Serbinë me u kthy. Kosovën e kemi çliru bashk me ju e me aleatët. Bashk do ta mbrojmë.Kosova është e qytetarëve të saj, e të gjithëve, edhe e serbëve të Kosovës, por jo e Serbisë. Mos i burgosni deputetët. Të dashur bashkëqytetarë, sot këtu jemi për shtet. Sot u themi JO marrëveshjeve, nga Gjakova. Marrëveshjet nuk kalojnë!”, u shpreh Haradinaj.
Lideri i Nismës, Fatmir Limaj tha para masës në Gjakovë se me Gjakovën kanë nisur manifestimet nëpër Komunë, që sipas tij do të mbahen në tërë Kosovën.
Ai shtoi se ky manifestim edhe njëherë po e vërteton atë se populli po i thotë jo marrëveshjeve më Serbinë.
“Asgjë nuk do të na ndalë. Nuk do të ndalemi derisa ti thuhet jo marrëveshjeve të dëmshme më Serbinë. Nuk do të na mbyll gojën askush”, ka thënë Limaj.
/tesheshi.com/
