Opozita e bashkuar VV, AAK dhe NISMA për Kosovën, në një konferencë të përbashkët për media kanë theksuar se qeveria aktuale nuk ka legjitimitet të vazhdojë më tej, pas aktgjykimit të Gjykatës Kushtetuese se me marrëveshjet për Asociacionin dhe Demarkacionin është shkelur Kushtetuta e vendit.
Deputetja Donika Kada-Bujupi, e cila është liruar së fundmi edhe nga masa e arrestit shtëpiak, ka thënë se opozita nuk do të ndalet së kërkuari anulimin e marrëveshjeve.
“Më 9 janar jemi të bashkuar të gjithë, jo vetëm opozita por çdo qytetar që Kosova të ketë një të ardhme të mirë dhe mos t’i pamundësohet e ardhmja në mënyrë që mos të kontrabandohet me marrëveshjet”, ka thënë Kadaj Bujupi.
Nënkryetari i VV-së, Driton Qaushi tha se opozita ka fituar, sa i përket Gjykatës Kushtetuese dhe marrëveshjeve.
“Ne kemi një vendim mjaft të qartë nga Kushtetuesja. Ne do të vazhdojmë me protesta edhe në këtë vit”, tha Qaushi, i cili ka shtuar se protesta do të jetë e qetë.
Deputetja e NISMA-s, Valdete Bajrami tha se janë në përgatitje të protestës së 9 janarit për mos faljen e tokës së Kosovës.
“Jemi në përgatitje të protestës së 9 janarit dhe qytetarët janë dëshmitarë të aktiviteteve tona për 4 muaj. E dinë të gjithë që më 28 nëntor dhe me debate tona kemi thënë se pushtetarët kanë bërë shkelje të Kushtetutës. Qeveria në krye me Isa Mustafën duhet të japë dorëheqje, jo për opozitën, por për qytetarët”, ka thënë Bajrami./tesheshi.com/
