Nga Blendi Gashi
Deputetët e opozitës kosovare kanë braktisur punimet e Kuvendit për ditën e sotme. Ata u larguan pas ftesës që ua bëri deputeti i Vetëvendosje-s, Ismail Kurteshi.
Ky vendim erdhi pasi gjatë seancës së sotme nuk ju funksionoj gazi lotsjellës. Edhe pse dy herë e mbushën me tym sallën e seancave plenare, mazhoranca vazhdonte punimet e Kuvendit.
Deputeti i VV-së Kurteshi, mazhorancës: Bjerni tupanave
Deputeti i VV-së, Ismail Kurteshi, gjatë një fjalimi që mbajti në foltoren kryesore të Kuvendit tha se në Kosovë nuk ka situatë normale.
“Ne po shkojmë ju bjerini tupanave. Skanerët duhet mi qu në qeveri me e zbulu korrupsionin e Isa Mustafës. Derisa në krye të Qeverisë të jetë Isa Mustafa , shkelësi i Kushtetutës , nuk do të ketë normalitet në Kosovë”, tha ai.
Kurteshi ka ftuar qytetarët që të dalin në protestë më 26 mars në sheshin “Skënderbe”.
Ai ka insistuar që kjo Qeveri të dërgohet në shtëpi.
Kurteshi tha se skaneri, duhet dërguar në qeveri për të skanuar korrupsionin e saj e jo për të skanuar deputetët e opozitës.
Topalli: Opozita do të merr qëndrim të përbashkët për largim nga Kuvendit
Portali tesheshi.com ka kontaktuar me deputetin e VV-së Faton Topalli i cili ka thënë se për ditën e sotme veç është marrë vendimi për të bojkotuar seancën por ende nuk kanë vendosur si do të veprojnë më tej.
“Për sot kemi braktisur punimet e Kuvendit. Kurse, më vonë do të dalim me një qëndrim të përbashkët si opozitë se si do të veprojmë”, ka thënë Topalli për tesheshi.com.
Kryeministri thirrje opozitës të kthehet në Kuvend
Pas braktisjes së punimeve, kryeministri Isa Mustafa në një fjalim që mbajti i bëri thirrje opozitës të kthehen në Kuvend.
Ai mohoi zërat se ka shkelur Kushtetutën e vendit duke thënë se nëse do ta bënte një gjë të tillë do të jepte përgjegjësi para LDK-së dhe qytetarëve të vendit.
Thirrje për rikthimin e opozitarëve në Kuvend bëri edhe deputetja e LDK-së, Teuta Sahatqija.
Mazhoranca ndërkohë po vazhdon punimet pa opozitën dhe situata në institucionin ligjvënës i është kthyer normalitetit.
Ndryshe, lënia eventuale e mandateve nga opozita krijon një rrethanë të re në Parlamentin e Kosovës. Kështu, nëse ky vendim zyrtarizohet, atëherë në vend të opozitës do të hyjnë në Kuvend dy kandidatët që ishin në listën e VV-së Ajnishahe Halimi dhe Arben Gecaj të cilët krijuan partinë e tyre Fraksion +.
Vendet tjera do t’iu shpërndahen partive paralamentare sipas kuotës më të madhe. /tesheshi.com/
