Deputetët opozitarë në Kosovë do të marrin pagën bazë prej 1488 euro, pa mëditje edhe pse kanë vendosur që ta bojkotojnë punën e legjislativit.
Opozitarët nuk po duan të dorëzojnë mandatin, duke ia lënë mundësinë vetes që të kthehen pas gjashtë muajve sipas afateve ligjore.
Partia e Ramush Haradinajt, AAK-ja, tashmë ka vendosur për bojkotimin e Kuvendit deri në shpalljen e zgjedhjeve të reja.
Ndërsa “Vetëvendosja” e “Nisma” ende janë në dilemë nëse do ta bëjnë një gjë të tillë apo jo, shkruan “Zëri”.
Por, pavarësisht kësaj, ata do të vazhdojnë të marrin pagën prej deputeti edhe në gjashtë muajt e ardhshëm, ani pse nuk do të shkojnë asnjë ditë pune në Kuvend.
Megjithatë, bojkotimi i punës së organit më të lartë ligjvënës ka vënë në siklet opozitën e bashkuar meqë nuk po gjejnë gjuhë të përbashkët nëse duhet apo jo ta bëjnë një bojkotim të tillë.
Në bazë të Rregullores së Punës së Kuvendit të Kosovës, deputetët marrin pagën edhe nëse nuk marrin pjesë në punën e organit ligjvënës për gjashtë muaj rresht.
Sipas rregullores, pas gjashtë muaj mospjesëmarrjeje në punën e Kuvendit, atëherë deputeti humb mandatin nëse nuk arrin që ta argumentojë mungesën e tij. /tesheshi.com/
