Presidenti Hashim Thaçi, sot pritet t’i drejtohet vetëm deputetëve të pozitës me fjalimin e tij vjetor, por seanca do të bojkotohet nga opozita.
“Hashim Thaçi nuk është lider uniteti, pasi që gjatë mandatit të tij si president më shumë i ka mbrojtur interesat e PDK-së sesa të shtetit. Prandaj nuk ia vlen të dëgjohet fjalimi i tij”, ka thënë vetëvendosësja Shqipe Pantina për “Zërin” duke shtuar se si grup parlamentar ende nuk kanë diskutuar nëse do të marrin pjesë në seancën e Kuvendit kur do ta mbajë fjalim presidenti, por, siç thotë ajo, personalisht do ta bojkotojë këtë fjalim.
Kurse shefi i grupit parlamentar të LDK-së, Avdullah Hoti, ka thënë për “Zërin” se LDK-ja ende nuk ka marrë vendim nëse do të marrin pjesë në fjalimin e sotëm të presidentit Thaçi, apo jo.
“Veprimin tonë se a do të marrim pjesë në fjalimin e presidentit do ta merrni vesh të premten”, ka thënë Hoti.
Ai thotë se Thaçi nuk e ka luajtur rolin e unitetit ashtu siç ia kërkon funksioni i tij dhe Kushtetuta e Republikës së Kosovës. /tesheshi.com/
