Ka marrë një kthesë të befasishme ligjërimi i kreut të PD-së Basha, sot në ditën e 6 të protestës. Tashmë ai kërkon jo vetëm qeveri teknike, por dhe ndërhyrjen në 7 ligje të reformës në Drejtësi. Dhe më pas sipas tij mund të bëhet Vettingu.
“Sot për këto institucione të reja të drejtësisë kjo maxhorancë që e ka frikë reformën në Drejtësi propozon 29 kandidatë për 27 pozicione, pra nuk ka zgjedhje ka emërime. Edi Rama dhe Ilir Meta duan t’i emërojnë vetë në vend që t’jua lënë vendin më të mirëve, më të pakorruptuarve. A mund ta pranojmë këtë ne? A mund të pranoni një drejtësi të kapur nga Edi Rama? Kujt i shërben një drejtësi e kapur nga Edi Rama? Nuk mund ta pranojmë. Po nëse janë ata që nuk kanë frikë nga Vettingu u them se menjëherë pas paktit për një qeveri të vullnetit të mirë për zgjedhje të lira dhe korrigjimit të 7 ligjeve, urdhëroni ta bëjmë Vettingun e të shohim kush ka frikë nga drejtësia e pavarur”, tha Basha.
“Nëse jo bashkë me qytetarët do e zgjidhim çështjen e zgjedhjve të lira dhe të drejtësisë së vërtetë për qytetarët shqiptarë”, përfundoi kreu i opozitës.
Dhe kjo përbën një risi të protestës së opozitës, ku në kushtëzimet e saj për t’u tërhequr përfshihen ligje të reformës në Drejtësi. Ajo akuzohet rregullisht nga mazhoranca se e ka penguar dhe po vijon ta pengojë me sa mundet këtë reformë. Edhe për rastin e protestës, sipas qeverisë qëndron skenari i bllokimit të Vettingut.
Ndërkohë, gjatë fjalimi në parlament, kryeministri Rama i quajti deri dhe hijena përfaqsuesit e opozitës. “Flasin me një përçartje ku nuk kanë asnjë raport me të vërtetën, por vetëm një synim, të tërheqin për hunde sa më shumë njerëz të varfër e të dëshpëruar me gënjeshtra pas gënjeshtrash, si hiena që jetojnë me kërma”, theksoi shefi i ezekutivit shqiptar. /tesheshi.com/
