Zëra politikë e mediatikë pranë opozitës kishin paralajmëruar një vizitë në Shkodër sot të kryeministrit Rama, dhe mungesën e këtij të fundit në qytetin verior e kanë përkthyer si triumf. Por nga zyra e Ramës në kryeministri thuhet se gjithçka është një sajesë.
“Kryeministri nuk ka pasur asnjë plan për të vizituar Shkodrën sot dhe vizita e tij e supozuar, është shpikur nga Partia Demokratike për të nxitur një tension të kotë në luftën e dëshpëruar me pafuqinë e saj. Sot kryeministri është në Vlorë për të marrë pjesë në takimin e planifikuar me rastin e 100-vjetorit të Shërbimit Stomatologjik në Vlore, ku nëna e tij, Aneta Rama, do të nderohet nga Urdhri i Stomatologeve të Shqipërisë, si gruaja e parë në këtë shërbim”, thuhet në njoftimin e qeverisë.
Në fakt qeveria ka qenë në Shkodër, por me ministrin Ahmetaj dhe deputetin e zonës, kolegun e tij Bushati. Ata kanë marrë pjesë në përurimin e Panairit të Punës. /tesheshi.com/
