Opozita e Kosovës fillon protestën maratonë pa ndalim në sheshin kryesor të Prishtinës.
Në shesh janë vendosur edhe disa tenda me pajisje për të qëndruar me ditë të tëra në shesh me kërkesë largimin e qeverisë.
Liderët e partive opozitare thanë se që nga sot sheshi do të jetë vendi ku qytetarët do ta shprehin vullnetin e tyre kundër siç kanë thënë ata, regjimit antikushtetues.
Visar Ymeri tha se tendat do t’i shërbejnë të gjitha kundërshtimeve qytetare duke e përfshirë edhe protestën e 27 shkurtit.
“Pra prej sot në ora 14:00 do ta fillojmë protestën tonë të vazhdueshme kundër këtij regjimi antikushtetues, kundër këtij regjimi anti republikë dhe kjo protestë do të vazhdojë deri në momentin e largimit të kësaj qeverie nga ku i ka uzurpuar postet publike”, tha Ymeri.
Kurse, Ramush Haradinaj, kryetar i AAK-së, tha se sot po fillon një etapë e re kundër qeverisë Mustafa-Thaçi.
“Ky aktivitet i kundërshtimit opozitar në sheshin e kundërshtimit tani më është bërë me të gjitha përgatitjet e duhura që nënkupton qëndrim të përhershëm, tenda, kemi marrë leje nga Komuna edhe çdo gjë është në përputhje me të drejtat tona si qytetar, si taksapagues por edhe si subjekte politike opozitare”, deklaroi ai.
Kurse, Fatmir Limaj i Nisma-s i ftoi të gjithë qytetarët që pakënaqësinë e tyre me pushtetin ta shprehin në shesh.
/tesheshi.com/
