“Gjatë dy ditëve të kaluara numri i nënshkrimeve ka arritur në afër 34 mijë”, bëhet e ditur nga subjekti më i madh opozitar kosovar, Lëvizja Vetëvendosje, sipas së cilës, “qindra aktivistë anekënd Kosovës janë mobilizuar për të mbledhur nënshkrimet e qytetarëve”.
Peticioni kërkon që “qeveria e Republikës së Kosovës të tërheqë menjëherë nënshkrimin nga katër marrëveshjet me Serbinë të datës 25 gusht 2015 si dhe nga marrëveshja për demarkacionin me Malin e Zi”.
Për një nga katër marrëveshjet Prishtinë-Beograd, të arritura në Bruksel, në raundin e 28-të të dialogut në nivel të lartë kryeministror, opozita kosovare shprehet me fjalën serbe “Zajednica” që në shqip do thotë “Bashkësi” dhe nënkupton Bashkësinë e komunave me shumicë serbe në Kosovë.
Opozita këtë javë ka bërë edhe një deklaratë të përbashkët kundër “bosnjëzimit të Kosovës” me marrëveshjet që ndajnë në vija etnike, të enjten edhe ka protestuar në Kuvend dhe ka bllokuar e ndërprerë seancën e parë të sesionit vjeshtor, ndërsa ka zhvilluar edhe “aksione simbolike” e paralajmëruar edhe protesta të tjera.
Deklarata ka paralajmëruar edhe se, “opozita e bashkuar është jashtëzakonisht e interesuar t’i filloj bisedimet me akterë të tjerë të shoqërisë ku si qëllim do të kishte krijimin e frontit të përbashkët politik”. /tesheshi.com/
