Partia Demokratike ka thirrur grupin e saj parlamentar, e të njëjtën gjë do ta bëjë edhe LSI-ja.
Opozita pritet të dalë me një aksion të përbashkët protestash duke pasur si synim arritjen e një fitoreje politike për çështjen e Rrugës së Kombit, ndërkohë që nuk do të ndalen këtu.
Siç mësohet, grupet parlamentare do të kërkojnë përgjegjësi për arrestimet e protestuesve dhe do të thërrasin në Kuvend ministrin e Brendshëm, Fatmir Xhafajn.
Paralel do të hartohet një ultimatum ku qeverisë do t’i jepet një kohë e shkurtër për të plotësuar disa kërkesa të ngutshme, ku në krye do të jetë lirimi i protestuesve, ulja e tarifës së rrugës, përgjegjësia për arrestimet dhe kërkesa të tjera.
Nëse nuk do të ndodhin këta, atëherë opozita do të ngrejë njerëzit në protestë përpara kryeministrisë, e cila mësohet se do të jetë pa ndalim.
Të shtunën pas protestës, PD, LSI dhe aleatët e tjerë të opozitës patën një takim mes tyre.
Vetë Lulzim Basha deklaroi nga Shkodra ku ishte në përkujtimin e vrasjeve të 2 prillit 1991 se protesta që nisi në Kukës do të vijojë pa mbarim.
Aksioni i protestës pritet të drejtohet nga kryebashkiakët e opozitës në Shkodër, Kukës, Tropojë, Burrel, Klos, Lezhë etj.
Tashmë opozita po kërkon një fitore politike pas së cilës pritet të dërgojë edhe kushtet ndaj qeverisë së Edi Ramës, që mendohen se do të jenë të forta për të siguruar një “detantë” deri në marrjen e statusit kandidat.
Pas kësaj fitore të pretenduar e të hamendësuar, pritet të merret një pakt i madh me mazhorancën përpara zgjedhjeve lokale të 2019-s, ku thelbi është ndryshimi i reformës territoriale-administrative dhe emërimi sa më i shpejtë i një kryeprokurori të Republikës që të ketë “ok” e opozitës. /tesheshi.com/
