Nga Blendi Gashi
Afera e përgjimeve “Pronto 2” me kryeprotagonist “shefin e shefave të PDK-së”, Adem Grabovcin ka tronditur sërish opinionin kosovar, katër vjet pas publikimit të aferës “Pronto 1”.
Në të dy rastet e përgjimeve, krerët e lartë të partisë më të madhe në vend, PDK-së, tregohet se si zyrtarë të saj flasin për punësime të militantëve të tyre në pozita të ndryshme, zgjedhen dhjetëra kryetarë e anëtarë bordesh, drejtorë ndërmarrjesh e agjencish të pavarura.
Sidomos përgjimet e publikuara dje, shihet qartë se si krerët e PDK-së kanë shtrirë ndikimin e tyre mbi secilin institucion të Kosovës, si mbi sistemin gjyqësor, atë prokurorial, mbi policinë e Kosovës, mbi media siç është Televizioni Publik, në universitetet etj.
Ndaj, publikimit të përgjimeve, ka reaguar edhe shefi i “Pronto 2”, Adem Grabovci, i cili është shprehur i pasigurt rreth vërtetësisë së përgjimeve, e ka pohuar se ndihet “i qetë dhe i pastër”.
“Të them të drejtën nuk i kam dëgjuar ato përgjime, por më së paku më bën përshtypje a është zëri im, apo s’është zëri im. Do të kërkoj ndihmë nga organet përkatëse, t’i drejtohemi atyre dhe t’i vërtetojmë ligjërisht [përgjimet]. Tendencat janë jo për të ndarë drejtësi, por për të më eliminuar politikisht”, ka thënë Grabovci, në një prononcim dhënë për mediat kosovare.
Por Prokuroria e Shtetit, ditën e publikimit të përgjimeve në fjalë ka zgjedhur heshtjen, ndërsa një ditë më vonë kryeprokurori Aleksandër Lumezi ka deklaruar për media se do të analizohen në detaje përgjimet për të parë nëse ka elementë për nisjen e hetimeve për vepër penale.
“Me sa jam i njoftuar përgjimet janë bërë nga prokuror kompetent lidhur me një rast që ka qenë duke u zhvillur, e që kanë dal nga aty. Sa i përket ndjekjes penal përgjimet kanë qenë në duart e prokurorëve të cilët kanë dhënë autorizim zyrtar për përgjime, ata do ta shikojnë nëse paraqesin elemente të veprës penale”, ka thënë Lumezi për mediat kosovare.
Përgjimet pasqyrojnë kapjen e shtetit
Partitë opozitare dhe shoqëria civile në Kosovë kërkojnë që Prokuroria të nisë menjëherë mbledhjen e provave për skandalin në fjalë.
Donika Kadaj-Bujupi, deputete e Vetëvendosje-s, thotë se bisedat e përgjuara telefonike mes krerëve të PDK-së nuk tregojnë veç mentalitetin kriminal të Hashim Thaçit, Kadri Veselit, Adem Grabovcit e protagonistëve tjerë, por sikurse edhe “Pronto 1”, ato pasyrojnë më së miri kapjen e shtetit nga nëntoka.
“Këto biseda japin shpjegim pse Kosova ende nuk e ka shtrirë sovranitetin në vend, pse Kosova ka proobleme me Demarkacionin me shtetet finje e pse i kanoset rreziku nga ‘Zajednica’, pse Kosova është e zhytur në mjerim e nuk ka kurrfarë mirëqënie sociale, pse papunësia në Kosovë sa vjen e rritet, etj.
Shpërdorimi i vazhdueshem i publikes dhe aktivitetet e paligjshme të PDK-së, siç dëshmohen në këto biseda telefonike, duhet të ndalen njëherë e përgjithmonë. Një pakicë kriminale që është vendosur me metoda kriminale në krye të shtetit, nuk mund ta rrënojë një shtet. Ia kemi borxh vendit tonë që ta çlirojmë nga ky rrjet kriminelesh”, ka thënë Kadaj-Bujupi, për tesheshi.com.
“Pronto 2” mund të heshtet si “Pronto 1”
Deputeti i partisë NISMA për Kosovën, Zafir Berisha, thotë se afera “Pronto 2”, tregon atë që ai e ka thënë për një kohë të gjatë, se vendi udhëhiqet nga një president, pasojat e të cilit do t’i vuajnë një kohë të gjatë qytetarët.
Berisha thotë se krerët e PDK-së janë të pamoralshëm dhe komunikimi i tyre në përgjime ka treguar fytyrën e vërtetë të PDK-së.
“Ka material për Prokurorinë, pasi me urdhëra punësohen njerëzit, dhe kjo nënkupton se ato veprime bëhen në kundërshtim me ligjet. Pra, ka vend që prokuroria të veproj nëse nuk është e kapur. Por, për fatin e keq sinjalet janë që edhe ky skandal do të shkoj në heshtje si ‘Pronto 1’”, ka deklaruar Berisha, për tesheshi.com.
Ish-zyrtari i PDK-së, Zafir Berisha, i cili u largua nga PDK në vitin 2010, ish-shefin e tij të partisë e quan “e keqja e vendit:, dhe thotë se nuk pret që ndonjë prej aktorëve të përgjimeve të fundit të japin dorëheqje, sepse sipas tij nuk kanë moral.
“Ashtu si i njoh unë, ata janë edhe me të këqinj se si kanë dal në opinion. Kjo është një perqindje e vogël e paftyrësisë së tyre”, ka thënë Berisha.
KDI kërkon hetim për “Dosjen e Shefave”
Organizata joqeveritare “Instituti Demokratik i Kosovës” – KDI, i ka bërë thirrje Prokurorisë së Shtetit të ndërmerr veprime ligjore dhe të mbledhë prova në lidhje me rastet që përmenden në bisedat e përgjuara të krerëve të PDK-së.
KDI thotë se e sheh çështje problematike edhe neglizhencën e prokurorëve të shtetit, të cilët ende nuk kanë reaguar për të marrë masa ndaj personave të implikuar në përgjimet telefonike.
Ndryshe, në ditët në vijim portali kosovar që ka publikuar përgjimet ka paralajmëruar publikimin edhe të videoincizime të tjera me protagonistë krerët e PDK-së. /tesheshi.com/
