Nga Blendi Gashi
Të gjitha marrëveshjet që Kosova ka arritur me Serbinë në dialogun e Brukselit, janë në bllokadë totale.
Dëshmia më e mirë për këtë është moslargimi i urës së Ibrit e paraparë të ndodh më datë 15 qershor të këtij muaji.
Duke parë se çdo ditë e më shumë pala serbe nuk po i përmbush obligimet për zbatimin e marrëveshjeve të arritura, qeveria e Kosovës i është ankuar Bashkimit Evropian, përmes ministres për dialog Edita Tahiri.
Shkelje të afateve në të gjitha marrëveshjet e arritura deri më tani janë konstatuar në raportin prej 31 faqesh të ministres Tahiri, që ia ka adresuar shefes për politikë të jashtme të Bashkimit Eevropian, Federica Mogherini.
Në raport qeveria është zotuar se nuk do të ketë zbatim të marrëveshjes për themelimin e Asociacionit, siç e quan opozita “Zajednicës” në të cilën po këmbëngul Serbia, përderisa nuk largohet barrikada park mbi lumin Ibër e nuk shuhen të gjitha strukturat paralele.
Opozita kosovare dhe analistët politik thonë se qeveria “Mustafa” përfundimisht duhet të ndërpret dialogun me Serbinë, pasi pala serbe ka treguar se nuk është e gatshme t’i përmbahet marrëveshjeve.
Muharrem Nitaj, zëdhënës i AAK-së thotë se qeveria po dëshmohet se nuk ka asnjë fuqi në raport me Serbinë, andaj është dashur shumë kohë më parë që t’i ndërpres bisedimet.
“Moszbatimi i marrëveshjeve nga ana e Serbisë ka qenë arsye e mjaftueshme që këto bisedime të mos vazhdonin më. Në fakt bisedimet nuk kanë shërbyer për normalizimin e marrëdhënieve me Serbinë, por për krijimin e terrenit për rikthimin e Serbisë në Kosovë. Prandaj përjashtimi i Serbisë nga Kosova, është jetike për funksionimin e Kosovës si shtet”, ka thënë Nitaj, për tesheshi.com.
Bilall Sherifi, nga partia NISMA për Kosovën kërkon që qeveria “Mustafa”, ta ndërpres menjëherë dialogun aktual me Serbinë dhe t’i hapet rrugë një formati tjetër të dialogut.
“Formati i dialogut si i tillë që në zanafillë të tij ka qenë keq i dizajnuar. Kosova nuk është dashur të pranojë një dialog të tillë ku temat e bisedimeve gjithnjë kanë qenë çështjet e brendshme të Kosovës. Prandaj ky format i dialogut duhet të ndërpritet menjëherë në mënyrë që të ndërtohet një format tjetër i bisedimeve në të cilin Kosova dhe Serbia të bisedojnë si dy shtete”, ka thënë Sherifi, për tesheshi.om.
Komunikimi me Serbinë të vendoset në baza të shëndosha
Arben Qirezi, analist politik thotë se procesi i dialogimit dhe implementimit të marrëveshjeve ka shkaktuar krizën në të cilën gjendet ky proces për shkak se është zhvilluar në baza jo të shëndosha.
“Kosova duhet të sillet si shtet sovran dhe të mos lejojë që zhvillimet e brendshme të jenë peng i Serbisë. Komunikimi me Serbinë, sikur me vendet e tjera përreth është i domosdoshëm, por ky komunikim duhet të vendoset në baza të shëndosha, përkatësisht në zvogëlimin, e jo rritjen e prezencës së Serbisë në Kosovë siç ka qenë deri më tani”, ka thënë Qirezi, për tesheshi.com.
