Nga Blendi Gashi
Qeveria e Kosovës e ka proceduar marrëveshjen e Demarkacionit me Malin e Zi, për ratifikim në kuvend. Tani i mbetet institucionit ligjvënës të vendos se kur do të thërras seancë plenare për të debatuar dhe hedhur në votim.
Sipas informatave, Kuvendi pritet javën e ardhshme, konkretisht më datë 11 gusht ta ketë në rend dite, ratifikimin e marrëveshjes në fjalë.
Duke parë se debati i organizuar më 3 gusht nuk solli asnjë rezultat, pasi asgjë nuk u qartësua, mbetet e paqartë nëse koalicioni qeverisës PDK-LDK do të ketë numrat për ta ratifikuar Demarkacionin, pasi disa deputetë të dy partive në fjalë pritet të mos e japing votën e tyre, ashtu si edhe deputetë të pavaruar.
Megjithatë, koha ka dëshmuar se në momentet e fundit pas presioneve nga shefat e partive, deputetë të caktuar të ndërrojnë qëndrim dhe të japin votën pro.
Një gjë është mëse e qartës se fati i Demarkacionit përcakton edhe fatin e koalcionit qeverisës PDK-LDK, fatin politik të kryeministrit aktual Isa Mustafa.
Opozita dhe njohës të çështjeve politike në Kosovë thonë se nëse deputetët i thonë jo Demarkacionit, atëherë është jo logjike të qëndrojë në këmbë qeveria “Mustafa”.
Deputetja e AAK-së, Teuta Haxhiu, thotë se në radhë të parë më e rëndësishme është të mos ndodh fare ratifikimi i Demarkacionit, sidomos pas argumenteve, të ofruara nga ana e ekspertëve.
Sipas Haxhiut nëse deputetët nuk e japing votën e tyre për Demarkacionin, atëherë nuk ka arsye as qeveria të vazhdojë më punën.
“Në një shtet ku ka rend kushtetues dhe ligjor do të duhej të ketë edhe përgjegjësi të paktën morale. Kjo natyrshëm nënkupton edhe përgjegjësi, gjithnjë për të treguar se mjaft vuajti vendi ynë nga udhëheqës të cilët janë servil ndaj miqve tanë ndërkombëtar në kurriz të Repubikës së Kosovës”, thotë deputetja Haxhiu, për tesheshi.com.
Analisti politik, Islam Krasniqi, thotë se nëse bie Demarkacioni duhet të bie edhe qeveria “Mustafa”, sepse pozita e ka mbrojtë me ngulm marrëveshjen në fjalë.
“Me dështimin e Demarkacionit edhe qeveria duhet të largohet, pasi duke e përdorur aparatin e dhunës për një vit, janë munduar t’ua mbyllin gojën qytetarëve, duke përdorur policinë. Asnjë etikë morale dhe ligjore nuk e lejon që pas mos ratifikimit të Demarkacionit të vazhdoj të qëndroj ende në këmbë kjo qeveri. Kjo marrëveshje qeverisë do t’i dalë dardhë me bishtë pasi ju ka besuar numrave për të ratifikuar marrëveshjen në fjalë”, ka thënë Krasniqi, përtesheshi.com.
Edhe gazetari Bajrush Morina, në një deklarim për mediat ka thënë se mosratifikimi i Demarkacionit mund ta rrëzojë pushtetin aktual.
“Nëse nuk kalon Demarkacioni, ky koalicion nuk ka arsye të vazhdojë mandatin. Demarkacioni dhe Asociacioni janë çështje që mund ta rrëzojnë Qeverinë”, ka thënë gazetari Morina. /tesheshi.com/
