Nga Blendi Gashi
Qeveria e Kosovës me gjithësejt 19 ministri aktualisht është më e madhja në Evropë, për çka ka pasur kritika jo të pakta, si nga opozita dhe analistët politik për numrin kaq të madh të dikastereve qeveritare.
Ky numër i lartë i ministrive është bërë me të vetmin qëllim që të rehatohen militantët partiak të partive në pushtet dhe partnerëve të tyre të koalicionit.
Duke pasur parasysh edhe kërkesat e bëra së fundmi edhe nga zyrtarja amerikane Viktoria Nuland për numrin e madh të ministrive, dy partitë e koalicionit PDK-ja dhe LDK-ja kanë nisur diskutimet për reduktimin e ministrive, pra shuarjen e disa prej tyre, konkretisht shkrirjen në ministri të tjera.
Nënkryetari i PDK-së, Enver Hoxhaj, ditë më parë ka thënë se ka vullnet brenda partisë së tyre që numri i ministrive të zvogëlohet dhe se kjo, sipas tij, ka gjasa të ndodhë brenda kësaj vere, ndonëse, ka theksuar, për këtë do të vendosin krerët e partive Isa Mustafa dhe Kadri Veseli.
Opozitarët dhe njohësit e rrethanave politike në vend thonë se sa më parë duhet të ndodh shuarja e disa ministrive pasi janë të panevojshme dhe vetëm e dëmtojnë buxhetin e shtetit.
Qeveria “Mustafa” në shërbim të militantëve
Deputetja e partisë, NISMA për Kosovën, Valdete Bajrami – Dushica, thotë se partia e tyre që nga fillimi i formimit të kabinetit qeveritar ka qenë kundër, dhe në vazhdimësi ka reaguar ndaj kabinetit qeveritar “Mustafa” pasi është më i madh në rajon, me ministra, zv.ministra dhe këshilltarë që edhe sot nuk dihet saktë numri i tyre.
“Kjo qeveri që nga fillimi nuk është dizajnuar që të jetë në shërbim të qytetarëve por në shërbim të PDK-së dhe LDK-së dhe militantëve të të dy partive. Kryeministri do të duhet të merret me kërkesën e znj. Nuland e cila ishte shumë e qartë që numri i ministrave duhet të zvoglohet, por ai si duket nuk e ka kuptuar mirë kërkesën e saj pasi që në vend të zvoglimit ai bën rritje me emërime dhe kjo ndodhi pas vizitës së znj.Nuland”.
“Nisma për Kosovën konsideron që kjo qeveri ka humbur legjitimitetin që nga janari dhe sa më parë që të shkojnë të gjithë duke filluar nga Isa aq më mirë do të jetë për vendin dhe për qytetarët”, thotë Bajrami-Dushica, për tesheshi.com.
Fadil Lepaja, njohës i rrethanave politike në vend thotë se para se të merret vendimi për shuarjen e dikastereve duhet të bëhet një studim serioz.
Lepaja, thotë se të gjitha vendet, përkatësisht opinioni ankohet për burokracinë e madhe, madje edhe në ato vende të cilat krahasuar me Kosovën, mund të thuhet se kanë qenë shumë dorështërnguar, edhe pse kanë qenë shumë më të pasura.
“Ne si një vend i ri, i varfër gjithsesi, kemi një burokraci përtej çdo logjike të shëndoshë dhe mbi të gjitha joefikase. Tash kur jemi te kuadri politik i cili e udhëheqë këtë armatë byrokratësh ajo është glomaze sepse aty rehatohet një shtresë e tërë e aktivistëve politik të partive. Andaj, duhet të bëhet një studim serioz se cilat ministri duhet të shuhen apo të shkrihen në ministri tjera”, thotë analisti Lepaja, për tesheshi.com.
Të shuhen këto ministri
Visar Rushiti i Institutit GAP thotë se Ministria e Administrimit dhe Pushtetit Lokal nuk ka më arsye të ekzistojë.
Prej momentit të përfundimit të decentralizimit kjo ministri ka përfunduar punën, dhe duhet të fuzionohet në Ministri ta Administratës Publike.
Sipas tij, edhe Ministria e Zhvillimit Ekonomik, Ministria e Tregtisë dhe Industrisë, Ministria e Infrastrukturës si dhe ajo e Financave duhet të bëhen bashkë dhe të jenë në një vend.
Ai thotë se edhe më mirë do të kryheshin punët në një ministri të quajtur Ministria e Zhvillimit Ekonomik.
Sipas tij, Ministria e Diasporës duhet të shpërndahet dhe të mos ekzistojë më.
“Punët që kryhen sot në këtë ministria lirshëm munden të kryhen në një Departament të Ministrisë së Punëve të Jashtme, pjesa tjetër nga e Kulturës dhe ajo Arsimit.
Ministria e Komuniteteve dhe e Kthimit duhet të shuhet pasi që janë zyrat për komunitete nëpër Komuna dhe Qeveri, andaj nuk duhet të ekzistojë.
Me këto 4 hapa Qeveria e Kosovës nga 19 mund të bien në 13 ministri dhe mund të kursehen 3.6 milionë euro”, ka thënë Rushiti, për mediat kosovare”.
Ndryshe, tri partitë e vogla që janë pjesë e koaliconit qeverisës, Lëvizja për Bashkim, Partia e Drejtësisë dhe Alternativa Demokratike e Kosovës, nuk e mbështesin idenë e reduktimit të numrit të ministrive, të paralajmëruar nga partnerët e mëdhenj, PDK e LDK
/tesheshi.com/
