Pas një fushate të mbizotëruar nga çështja e emigracionit, në zgjedhjet e përgjithshme të së enjtes në Danimarkë ka dalë fituese opozita e qendrës së djathtë, duke nënkuptuar kështu ndërprerjen e qeverisjes së vendit nga kryeministrja socialdemokrate Helle Thorning-Schmidt.
Udhëheqësi i Partisë Liberale, Lars Lokke Rasmussen, pritet të jetë kryeministri i ri i vendit, ndërsa gëzon mbështetjen e aleatëve të tij.
Blloku opozitar ka fituar 52.3% të votave, apo, ndryshe, ka siguruar 90 vende në parlamentin me 179 deputetë.
Thorning-Schimdt dhe aleatët e saj mblodhën vetëm 47.7% të votave, baraz me 85 vende në parlament. E para kryeministre femër e Danimarkës, Helle Thorning-Schmidt deklaroi para mbështetësve të saj se sot do të japë dorëheqjen nga posti qeveritar dhe si kryetare e Partisë Socialdemokrate.
Surpriza e zgjedhjeve ishte dalja si forcë e dytë e Partisë Popullore Daneze, një parti populiste dhe kundër emigracionit, që fitoi 21.1% të votave. Ky grupim politik u kthye kështu në partinë më të madhe në bllokun opozitar, duke lënë pas liberalët e Rasmussen-it, të tkurrur në mbështetjen që siguruan, nga 26.7% në 2011-n në 19.5% kësaj here.
Sidoqoftë, udhëheqësi i Partisë Popullore Daneze, Kristian Thulesen Dahl, dha shenja se do t’i jepte mbështetje Rasmussen-it për t’u bërë kryeministër, siç pritet të bëjnë dhe Aleanca Liberale dhe konservatorët. /tesheshi.com/
