Tre partitë opozitare në Kosovë vendosën të kundërshtojnë marrëveshjet me Serbinë, arritur në Bruksel, dhe demarkacionin me Malin e Zi, duke hartuar për këtë qëllim edhe një axhendë të përbashkët.
Pas takimit, tre liderët e partive opozitare, AAK, Nisma e Vetëvendosje, thanë se do të iniciojnë nënshkrimin e një peticioni në gjithë Kosovën kundër marrëveshjeve të arritura me Serbinë në Bruksel për asocacionin e komunave serbe dhe kundër demarkacionit me Malin e Zi.
Përpos peticionit, partitë opozitare do të organizojnë shpejt edhe protesta e demostrata, edhe pse nuk kanë dhënë një datë të nisjes së aksionit opozitar.
Lideri i AAK-së, Ramush Haradinaj kërkoi që nismës së partisë së tij dhe Vetëvendosjes e Nismës t’i bashkohen edhe grupet e tjera të shoqërisë për t’i kundërshtuar këto marrëveshje.
Fatmir Limaj tha se protestat e aksioni i përbashkëi i opozitës është shpresa e vetme për të ndryshuar situatën në vend.
“Kosova nuk ka as parlament të besueshëm sepse atë e ka shkatërruar ky koalicion qeverisës”, nënvizoi Limaj, duke kërkuar edhe dorëheqjen e qeverisë së Kosovës e mbajtjen e zgjedhjeve të parakohshme. /tesheshi.com/
