Një incident është shënuar mes drejtuesit të Opinion-it, Blendi Fevziu dhe kreut demokrat Basha, përgjatë emisionit të së enjtes mbrëma realizuar në çadrën e protestës së opozitës para Kryeministrisë.
Në një moment, Basha ka ftuar nga masa e përkrahësve dikë për të cilin ai tha se kishte qenë një socialist, por që kishte vendosur t’i bashkohej protestës, me qëllim që ai të rrëfente “pse”-në e tij politike të këtij ndryshimi pozicionesh, gjë që nuk është pranuar këmbëngulësisht nga Fevziu.
I dominuar si moment dhe nga ilariteti i njerëzve brenda çadrës, Fezviu i tha Bashës se mund t’i lejonte shndërrimin e emisionit në miting. Basha i cili kishte hequr mikrofonin e tij të tipit “çimkë” për të intervistuar socialistin e konvertuar në demokrat, u tërhoq më pas nga gjesti i tij.
Ky moment ishte prelud i një interviste të tensionuar, që hera-herës shoqërohej dhe nën thirrjet e masës së elektrizuar politikisht. Ajo që Fevziu nuk pranonte si formë përgjigjeje nga Basha, ishte stili populist i këtij të fundit për çdo lloj pyetjeje. /tesheshi.com/
