Ushtria e Lirë Siriane, e mbështetur nga Turqia, ka nisur një operacion të madh tokësor kundër grupeve të armatosura kurde në krahinën siriane të Afrin, raporton Anadolu.
Kryeministri turk Binali Yildirim tha se ushtria turke, së bashku me pjesëtarët e Ushtrisë së Lirë Siriane, janë futur pesë kilometra në zonën në veri të qytetit Afrina në Siri.
Ushtria turke hyri në Siri në kalimin kufitar Kilis. Kryeministri turk tha se plani i ushtrisë së tij është të krijojë një zonë të sigurt prej 30 kilometra nga kufiri turk dhe se operacioni i nisur do të zhvillohej në katër faza. Në të njëjtën kohë, forcat kurde mohuan hyrjen e trupave turke në Siri.
Burimet diplomatike turke thanë se ministria e jashtme po punonte për të informuar vendet që kufizohen me Sirinë për një operacion të kryer rreth qytetit Afrin.
Anadolu njofton se një përfaqësues turk në Kombet e Bashkuara ka njoftuar anëtarët e përhershëm të Këshillit të Sigurimit për operacionin e kryer në veri të Sirisë.
Lidhur me operacionin janë njoftuar edhe vende të tjera, kryesisht anëtarë të Këshillit për Bashkëpunim të Gjirit dhe Irani, njoftoi Anadolu.
Sipas njoftimeve, trupat e Ushtrisë së Lirë Siriane filluan të lëvizin drejt Afrinit herët të dielën.
Njësitë e YPG kanë konfirmuar këto pohime, duke thënë se ishin shënjestruar dy fshatra në rrethin e Bibilit në kufirin me Turqinë.
AP thotë se Afrin ndodhet nën kontrollin e forcave kurde siriane të cilat autoritetet turke i shohin si pjesë të rebelimit kurd në Turqinë juglindore, dhe se këto forca formojnë bazën e Forcave Demokratike të Sirisë (SDF), aleati kryesor amerikan në luftën kundër Shtetit Islamik në Siri. /tesheshi.com/
